ქუთაისის სააპელაციო სასამართლომ "ბათუმელებისა" და "ნეტგაზეთის" დამფუძნებლის მზია ამაღლობელის განაჩენი ძალაში დატოვა. ბათუმის საქალაქო სასამართლოს მოსამართლე ნინო სახელაშვილმა მას 2-წლიანი პატიმრობა 6 აგვისტოს მიუსაჯა. მოსამართლემ ბრალი გადააკვალიფიცირა და მზია ამაღლობელი დამნაშავედ ცნო არა პოლიციელზე თავდასხმის, არამედ პოლიციელის წინააღმდეგობის მუხლით.

მზია ამაღლობელმა სააპელაციო სასამართლოში თავის სიტყვაში თქვა, რომ არ აშინებს პატიმრობა, აშინებს ის, რა დახვდება გარეთ.

"ზოგადად, პატიმრობა არც ადვილია და არც მარტივი, მაგრამ არც საშიშია. მინდა გითხრათ, რომ მე პატიმრობა კი არ მაშინებს, არამედ ის, პატიმრობიდან რომ გამოვალ, გარეთ რა დამხვდება — ქვეყანა, რომელიც თავისუფლებისთვის, დემოკრატიისთვის, ევროპული მომავლისთვის იბრძვის, თუ დამხვდება ქვეყანა, რომელიც პროპაგანდამ, ეკონომიკურმა გავლენებმა… და ტანკის გარეშე დაპყრობილი ქვეყანა რუსეთის მიერ.

ასე მგონია, რომ სამშობლოს სიყვარულის და ღირსების შეგრძნება არის თანდაყოლილი, ისეთი, რომელსაც ვერ წაგართმევენ. დღეს ყველას ღირსება გადის საქართველოს კონსტიტუციის დაცვაზე.

უბრალოდ მოგიწოდებთ, ვიბრძოლოთ, სანამ გვიანი არ არის.

კონსტიტუციი დაცვის ვალდებულება გვაქვს.

ბრძოლა ბოლომდე", — თქვა ამაღლობელმა (ტექსტს "პულბიკა" ავრცელებს).