ევროკომისიის პრესსპიკერმა გაფართოების საკითხებში, გიომ მერსიემ "ევროსკოპს" დაუდასტურა, რომ საქართველო ევროკავშირის გაფართოების ფორუმზე მიწვეული არ არის.

მისი თქმით, 2024 წელს ევროპულმა საბჭომ დაასკვნა, რომ საქართველოს ევროკავშირში გაწევრიანების პროცესი დე ფაქტო შეჩერდა, რის შემდეგაც, შეამცირეს პოლიტიკური კონტაქტები საქართველოს ხელისუფლებასთან.

"გასულ კვირას ჩვენ წარვადგინეთ ჩვენი გაფართოების ანგარიში საქართველოს შესახებ და ვფიქრობ, ჩვენი პოზიცია საკმაოდ ნათლად იყო ჩამოყალიბებული. ანგარიში კიდევ ერთხელ აჩვენებს, რომ საქართველო კიდევ უფრო შორდება ევროკავშირის გზას. ანგარიშში აღნიშნულია, რომ იყო უკუსვლა ევროკავშირში გაწევრიანების რეფორმების კუთხით, და ეს ნამდვილად უპრეცედენტოა კანდიდატი ქვეყნისთვის. ასე რომ, სიტუაცია ნამდვილად გაუარესდა, ბოლო რამდენიმე თვის განმავლობაში. როგორც იცით, 2024 წელს ევროპულმა საბჭომ დაასკვნა, რომ საქართველოს ევროკავშირში გაწევრიანების პროცესი დე ფაქტო შეჩერდა. რაც შეეხება ჩვენს ურთიერთობებს საქართველოს ხელისუფლებასთან, ჩვენ შევამცირეთ პოლიტიკური კონტაქტები მათთან. ასე რომ, გაფართოების ანგარიშთან, გაფართოების ფორუმთან დაკავშირებით, შემიძლია დავადასტურო, რომ ამ ფონზე, საქართველო არ არის მოწვეული გაფართოების ფორუმზე", — გაუცხადა გიიომ მერსიემ "ევროსკოპს".

შეგახსენებთ, რომ ევროკავშირის გაფართოების ფორუმი ბრიუსელში 18 ნოემბერს გაიმართება. ღონისძიების ორგანიზატორი ევროკომისიაა. ფორუმზე სიტყვით გამოვლენ ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი ანტონიო კოშტა, ევროკომისრები მარტა კოსი და კაია კალასი.