სასამართლომ ლელო — ძლიერი საქართველოს ლიდერებს, მამუკა ხაზარაძესა და ბადრი ჯაფარიძეს ე.წ საბოტაჟის საქმეზე აღკვეთის ღონისძიების სახით მილიონ-მილიონიანი გირაო შეეფარდათ. გადაწყვეტილება მოსამართლე ფიქრია სიქტურაშვილმა გამოაცხადა.

ოპოზიციონერ ლიდერებს გირაოს გადახდის ვადად 30 დღე განესაზღვრათ.

მომდევნო სასამართლო პროცესი 25 დეკემბერს ჩაინიშნა.

ცნობისთვის, 6 ნოემბერს, პროკურატურაში გამართულ ბრიფინგზე გენერალურმა პროკურორმა გიორგი გვარაკიძემ განაცხადა, რომ 8 ოპოზიციონერ პოლიტიკოსს — მიხეილ სააკაშვილის, გიორგი ვაშაძის, ნიკა გვარამიას, ნიკანორ მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის წინააღმდეგ სისხლისსამართლებრივი დევნა დაიწყო შემდეგი ბრალდებებით:

  • სახელმწიფო საბოტაჟი;

  • უცხო ქვეყნისათვის მტრულ საქმიანობაში დახმარება;

  • საქართველოს კონსტიტუციური წყობილებისა და ეროვნული უშიშროების საფუძვლების წინააღმდეგ მიმართული საქმიანობის დაფინანსება;

  • მოწოდება საქართველოს კონსტიტუციური წყობილების ძალადობით შეცვლისაკენ.

ვის რა ბრალდება წარედგინა?

მიხეილ სააკაშვილი — საქართველოს სისხლის სამართლის კოდექსის 317-ე მუხლი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდების ფაქტზე;

ზურაბ გირჩი ჯაფარიძე და გიორგი ვაშაძე — საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლი, რაც საბოტაჟის და უცხო ქვეყნისათვის მტრულ საქმიანობაში დახმარებას გულისხმობს;

ელენე ხოშტარია — საქართველოს სისხლის სამართლის კოდექსის 318-ე მუხლის პირველი ნაწილი, 319-ე მუხლი და 321-ე პრიმა მუხლის პირველი ნაწილი, რაც საბოტაჟს, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარების ფაქტს გულისხმობს;

ნიკა გვარამია, ნიკანორ მელია, მამუკა ხაზარაძე და ბადრი ჯაფარიძე — საქართველოს სისხლის სამართლის კოდექსის 318-ე მუხლის პირველი ნაწილი, რაც სახელმწიფო საბოტაჟს გულისხმობს.

ვრცლად საბოტაჟის საქმეზე წაიკითხეთ აქ.