ევროკავშირმა რუსეთის მოქალაქეებისთვის ვიზების გაცემის წესები გაამკაცრა, რაც, მათი განმარტებით, "მიგრაციის იარაღად ქცევასთან, დივერსიულ ქმედებებთან და ვიზების შესაძლო არასათანადო გამოყენებასთანაა" დაკავშირებული. ამის შესახებ ინფორმაციას Reuters ავრცელებს.

ევროკომისიის განცხადებით, რუსეთის მოქალაქეებს საზღვარზე მრავალჯერადი შესვლისთვის საჭირო ვიზები ვეღარ მიიღებენ და ყოველ მოგზაურობაზე ახალი ვიზის მიღება მოუწევთ. როგორც განცხადებაშია აღნიშნული, მიზანი საზოგადოებრივი წესრიგისა და უსაფრთხოების დაცვაა.

გამონაკლისს წარმოადგენენ დისიდენტები, დამოუკიდებელი ჟურნალისტები და ადამიანის უფლებების დამცველები.

"ომის დაწყება და მერე იმის მოლოდინი, რომ ევროპაში თავისუფლად ივლი, ძნელად გასამართლებელია... ევროკავშირი ამკაცრებს ვიზის წესებს რუსეთის მოქალაქეებისთვის ევროპის ტერიტორიაზე მიმდინარე დრონებით დივერსიებისა და საბოტაჟის გაგრძელების ფონზე. ევროკავშირში მოგზაურობა არის პრივილეგია და არა გარანტია," — დაწერა პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა X-ზე.