შსს-ს ინფორმაციით, ოცნების მხარდამჭერი მანჩო გიორგობიანი ჯგუფური ძალადობის ორგანიზებაში და მასში მონაწილეობისთვის დააკავეს.

"მიმდინარე წლის 2 ნოემბერს, გვიან ღამით, ბრალდებულმა გიორგობიანმა სიტყვიერი შეურაცხყოფა მიაყენა ერთ-ერთი სუპერმარკეტის თანამშრომლებს — 2006 წელს დაბადებულ თ.მ.-ს და 2004 წელს დაბადებულ ე.მ.-ს, რის შემდეგაც დაუკავშირდა თავის ნაცნობს — 1996 წელს დაბადებულ ჯ.ჩ.-ს, რომელიც ადგილზე თანმხლებ პირებთან ერთად მივიდა, რა დროსაც მათ, სუპერმარკეტის ორი თანამშრომელი ძალის გამოყენებით გაიყვანეს გარე ტერიტორიაზე და ჯგუფურად ფიზიკურად გაუსწორდნენ," — ვკითხულობთ განცხადებაში.

უწყების განცხადებაში ვკითხულობთ, რომ დანაშაულში მონაწილე ექვსივე პირი დააკავეს და გამოძიება სისხლის სამართლის კოდექსის 225-ე და 126-ე მუხლებით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.

ცნობისთვის, გუშინ, მანჩო გიორგობიანმა სოციალურ ქსელში განცხადება გააკეთა, რომელშიც შს მინისტრს, გეკა გელაძეს ემუქრებოდა — "გეკა გელაძე ხარ თუ ვიღაცა, თავში ხო არ აგივარდა ბიჭო, აგწევთ ჰაერში მთელ შსს-ს და ჩამოგალაბორანტებ მინისტრობიდან!". გიორგობიანმა პოსტი მოგვიანებით წაშალა.