ზვიად ცეცხლაძის ოჯახი აპირებს პატივის, ღირსების და საქმიანი რეპუტაციის შელახვის საქმეზე სასამართლოში ოცნების პარლამენტის თავმჯდომარეს, შალვა პაპუაშვილს უჩივლოს — ამის შესახებ ზვიად ცეცხლაძის მამამ, ზურაბ ცეცხლაძემ განაცხადა.

საქმე ეხება პაპუაშვილის განცხადებებს, რომელშიც ის პატიმარ ზვიად ცეცხლაძეს ტერორისტს უწოდებს.

"[პაპუაშვილი] ტერორისტს უწოდებს ჩემს შვილს, რომელიც ტერორიზმის მუხლით საერთოდ არ იყო გასამართლებული და ის მუხლიც კი, რაც იყო თავიდან წარდგენილი, უფრო მსუბუქით შეუცვალეს. მე მოველაპარაკე ზვიადს და ჩვენ ვამზადებთ სარჩელს პაპუაშვილის წინააღმდეგ, რათა ბოდიში მოვახდევინოთ იმ ამაზრზენი სიტყვებისთვის, რასაც ის 20 წლის ბიჭს უწოდებს", — განაცხადა ზურაბ ცეცხლაძემ თბილისის საკრებულოსთან გამართულ საპროტესტო აქციაზე.

22 ოქტომბერს, შალვა პაპუაშვილმა სოციალურ ქსელში გაავრცელა განცხადება, სადაც ევროკავშირის ელჩზე საქართველოში, პაველ ჰელჩინსკიზე საუბრობდა, რომელმაც წერილი მიწერა ციხეში მყოფ ზვიად ცეცხლაძეს.

პაპუაშვილმა განცხადებაში ზვიად ცეცხლაძეს ტერორისტი უწოდა და აღნიშნა, რომ "ტერორისტთან მიმოწერა, არანაირი ყოფითი, ყოველდღიური დიპლომატიური საქმიანობა არ არის".

"უბრალოდ გამაოგნებელია, როდესაც ევროკავშირის საელჩო ტერორისტს წერს წერილს. ამას ვენის კონვენცია სჭირდება თუ უბრალოდ, ადამიანობა სჭირდება, რომ ტერორისტთან არ იყო სალონურ მიმოწერაში?! გუშინ ჩვენ მოვისმინეთ აბსოლუტურად სამარცხვინო განმარტება, რომ თითქოს, ეს ჩვეულებრივი დიპლომატიური პრაქტიკაა, რომ ფოსტა მისდით საქართველოს მოქალაქეებიდან და საელჩოს თანამშრომლები სხედან და მათ პასუხებს სწერენ მიმდინარე საინტერესო, აქტუალურ საკითხებზე. მართლა შტერები ვგონივართ, მე მგონი, ამათ ქართველები. კიდევ ერთხელ, ტერორისტთან მიმოწერა, არანაირი ყოფითი, ყოველდღიური დიპლომატიური საქმიანობა არ არის. თვითონ ფაქტი არის სკანდალი, მაგრამ მეორე არის კიდევ წერილის შინაარსი. აქციებზე ძალადობის გამო მსჯავრდებული ადამიანების გათავისუფლებას ითხოვენ და ჩვენ გვეუბნებიან რომ ეს არ არის მხარდაჭერა?! ვის ატყუებენ?!" — განაცხადა პაპუაშვილმა.

შეგახსენებთ, პროევროპულ აქციებში მონაწილეობისთვის დაკავებულ ზვიად ცეცხლაძეს ბრალად ჯგუფური ძალადობის ორგანიზება ედება და სასამართლომ მას 2 წლითა და 6 თვით პატიმრობა მიუსაჯა.