"კარგი იქნებოდა, საქართველოს მთავრობის წარმომადგენლებმა სარკეში ჩაიხედონ. თუ თქვენ დარწმუნებული ხართ თქვენს დემოკრატიაში, არ გექნებოდათ ოპონენტების დაპატიმრების საჭიროება", - ამის შესახებ ევროკომისიაში გამართულ ბრიფინგზე ევროკავშირის საგარეო პოლიტიკური უწყების პრესსპიკერმა, ანიტა ჰიპერმა განაცხადა და "ოცნების" პარლამენტის თავმჯდომარის, შალვა პაპუაშვილის განცხადებას გამოეხმაურა იმის შესახებ, რომ 2 ოქტომბერს, 71 წლის აზა ჩილაჩავას "გზის უკანონო გადაკეტვის" ბრალდებით დაკავებაზე პასუხისმგებლობა ფინეთის საგარეო საქმეთა მინისტრს, ევროკავშირის ელჩსა და ევროკომისიის პრესსპიკერს ეკისრებათ.

"კარგი იქნებოდა, საქართველოს მთავრობის წარმომადგენლებმა სარკეში ჩაიხედონ და რეალობას თვალებში შეხედოს. ისინი ძალიან რეპრესიულ რეჟიმს ამყარებენ, რომელიც მშვიდობიანი ხალხის, მედიის, ჟურნალისტების წინააღმდეგაა მიმართული. კიდევ ერთხელ, თუ თქვენ დარწმუნებული ხართ თქვენს დემოკრატიაში, არ გექნებოდათ ოპონენტების დაპატიმრების საჭიროებას.

ჩვენ წინააღმდეგი ვართ ძალადობის ყველა ფორმისა. მოვუწოდებთ ხელისუფლებას, დაუბრუნდეს დიალოგს საკუთარ საზოგადოებასთან და უზრუნველყოს, რომ არ მოხდეს ამ ძალადობის შემდგომი ესკალაცია", — თქვა ანიტა ჰიპირმა.

ცნობისათვის, 71 წლის აზა ჩილაჩავას დაპატიმრებაზე კომენტირებისას ოცნების პარლამენტის თავმჯდომარემ, შალვა პაპუაშვილმა განაცხადა, რომ "მორალი და პოლიტიკური პასუხისმგებლობა" აზა ჩილაჩავას დაპატიმრებაზე "არის ფინეთის საგარეო საქმეთა მინისტრზე, ევროკავშირის ელჩზე, რომელსაც ხმა არ ამოუღია 4 ოქტომბრის შტურმზე და სოლიდარობას უცხადებენ რადიკალებს, პასუხისმგებლობაა ევროკომისიის პრესსპიკერზე, რომელმაც სოლიდარობა გამოუცხადა 50 ადამიანს, რომელიც ქუჩას კეტავენ".