ირანის პრეზიდენტმა მასუდ პეზეშკიანმა სახელმწიფო მედიასთან საუბარში განაცხადა, რომ თეირანი საკუთარ ბირთვულ ობიექტებს "კიდევ უფრო დიდი ძალით" აღადგენს, თუმცა ქვეყანა ბირთვული იარაღის შექმნას არ ისახავს მიზნად. ამის შესახებ ინფორმაციას Reuters ავრცელებს.

აშშ-ის პრეზიდენტმა დონალდ ტრამპმა განაცხადა, თუ თეირანი იმ ობიექტების აღდგენას დაიწყებს, რომლებიც აშშ-მა ივნისში დაბომბა, ირანის ბირთვულ ობიექტებზე ახალი შეტევების დაწყების შესახებ ბრძანებას გასცემს.

პზეშკიანმა აღნიშნული კომენტარი ირანის ატომური ენერგიის ორგანიზაციაში ვიზიტის დროს გააკეთა, სადაც ის ქვეყნის ბირთვული ინდუსტრიის მაღალი რანგის ხელმძღვანელებს შეხვდა.

"შენობებისა და ქარხნების დანგრევა ჩვენთვის პრობლემას არ შექმნის — ჩვენ მათ კვლავ ავაშენებთ, და უფრო დიდი ძალით," — განაცხადა ირანის პრეზიდენტმა სახელმწიფო მედიასთან.

ივნისში აშშ-მა ირანის ბირთვულ ობიექტებზე შეტევა განახორციელა — ვაშინგტონის თქმით, ეს ობიექტები ბირთვული იარაღის პროგრამასთან იყო დაკავშირებული. თეირანი კი ამტკიცებს, რომ მისი ბირთვული პროგრამა მხოლოდ სამოქალაქო მიზნებს ემსახურება.