ფილოსოფოსი ლევან ღამბაშიძე, რომელსაც ქართული ოცნების დეპუტატმა, ნინო წილოსანმა ცრუ ინფორმაციის გავრცელების ბრალდებით უჩივლა, სოციალურ ქსელში სასამართლოს მიერ ნინო წილოსანის სარჩელის დაკმაყოფილებას ეხმაურება და წერს, რომ სასამართლო ქართული ოცნებისაგან დამოუკიდებელ გადაწყვეტილებებს ვერ იღებს. მისივე თქმით, თავს დამნაშავედ არ გრძნობს და გადაწყვეტილების გასაჩივრებას აპირებს.

"პიროვნულ დონეზე, ნინოს (რახან დავმეგობრდით და სახელებით მივმართავთ ერთმანეთს) მინდა ვუთხრა, რომ გავიგე მისი ძახილი. ამოვიკითხე რის თქმასაც ცდილობს და ადამიანურად თანავუგრძნობ იმ ვითარების გამო, რაშიც გაყო თავი. ალბათ პარალელურ სამყაროში კარგი ადამიანის სახელიც შეიძლება ჰქონოდა და ვხვდები როგორ განიცდის ამას.

რაც შეეხება მარინა აზამანცევას…

ტყუილია რომ სასამართლომ დაადასტურა რომ მე ვიცრუე. სასამართლომ თუ რამე დაადასტურა, არის ის, რომ სასამართლო ქართული ოცნებისაგან დამოუკიდებელ გადაწყვეტილებებს ვერ იღებს. ერთი ნინო დათაშვილია კრიმინალი, ანდრო ჭიჭინაძე ბანდის წევრი, მზია ამაღლობელი უცხოეთის აგენტი და მე ცილისმწამებელი. რა თქმა უნდა, არ ვცნობ თავს დამნაშავედ და ამ გადაწყვეტილებას აუცილებლად გავასაჩივრებ ყველგან, სადაც საჭიროა.

იმედი განმიმტკიცდაო. დეზინფორმაცია და ცრუ ბრალდება რომ უპასუხოდ არ დარჩება ამ ქვეყანაში, ეგ იმ ხალხს უმტკიცეთ, უცხოეთის აგენტებსა და დახელფასებულებს რომ უძახის თქვენი რეჟიმის ყველა წევრი ყოველ დღე.

კეთილშობილურ მიზნებსა და მორალურ ქმედებებს რაც შეეხება, გთხოვთ ამიხსენით, ძალაუფლების მქონე მილიონერი რომ მასწავლებელს ართმევს ფულს და კეთილ საქმეს მოახმარს, ეგ რანაირად არის მორალური ქმედება? ეგ სწორი იქნებოდა ბავშვობაში "იდუჰ ნიბორ"-ი რომ წაგვეკითხა. მე კი მჯერა რომ საქართველოში მორალის უფრო სხვა, სწორი გაგებაა გავრცელებული.

და ყველაზე მეტად თანხა ვისაც სჭირდება, მათზე პირადად ჩემგან ამოღებული ფულით კი არ უნდა იზრუნოთ, თქვენივე მტკიცებით თქვენი პირდაპირი მოვალეობაა ეგ და მთელი ქვეყნის ბიუჯეტი გაქვთ ამისთვის ჩაბარებული. თუმცა აგერ თქვენივე პროკურატურას თუ დავუჯერებთ, კარგად ვხედავთ როგორაც ეპყრობა რეჟიმზე მომუშავე მსხვილ და წვრილფეხობა ქვეყნის ბიუჯეტს.

მეტს აღარაფერს ვიტყვი. ხალხი წლობითაა ციხეში გამოკეტილი და ეს შემთხვევა ორი საათითაც არ იმსახურებს საზოგადოების ყურადღებას", — დაწერა ლევან ღამბაშიძემ.

მანამდე, ნინო წილოსანმა სოციალურ ქსელში დაწერა, რომ სასამართლომ მისი სარჩელი სრულად დააკმაყოფილა. მისივე განცხადებით, მორალური ზიანის საკითხში ღამბაშიძისთვის დაკისრებულ თანხას საქველმოქმედო აქტივობებისთვის გამოიყენებს.

"ლევან ღამბაშიძემ იცრუა ჩემი ოჯახის წინააღმდეგ გავრცელებულ ინფორმაციაში, რაც სასამართლოს გადაწყვეტილებამაც დაადასტურა!!

დააკმაყოფილა რა სრულად ჩემი სარჩელი, ამით კიდევ ერთხელ განამტკიცა იმედი რომ არც ერთი დეზინფორმაცია და ცრუ ბრალდება უპასუხოდ არ დარჩება.
რაც შეეხება მორალური ზიანის ნაწილში მისთვის დაკისრებულ თანხას, მოხარული ვიქნები ჩემს სხვა საქველმოქმედო აქტივობებთან ერთად აღნიშნული თანხა მათ გადავცე, ვისაც ყველაზე მეტად სჭირდება. იქნებ ამ მორალურად სწორმა ნაბიჯმა კიდევ ერთხელ დაანახოს ლევანს, რომ თავისი ძალისხმევა უფრო კეთილშობილურ და სწორ მიზნებს მოახმაროს", — დაწერა ნინო წილოსანმა.

შეგახსენებთ, რომ საქმე ეხება ლევან ღამბაშიძის მიერ 12 თებერვალს სოციალურ ქსელში გამოქვეყნებულ სტატუსს, სადაც ის წერს, რომ ნინო წილოსანის ოჯახმა "ბიუჯეტიდან 65 მილიონი ლარი მოიპარა".

პასუხად ნინო წილოსანმა სოციალურ ქსელში დაწერა, რომ თუ საჯაროდ არ უარყოფდა ლევან ღამბაშიძე ამ ბრალდებას სასამართლოში შეხვდებოდნენ.

• ლევან ღამბაშიძე: წილოსანმა მიჩივლა და ათი ათას ლარს მთხოვს