თურქეთის კატასტროფებისა და საგანგებო სიტუაციების მართვის სამსახურის (AFAD) ცნობით, 6.1 მაგნიტუდის მიწისძვრა ბალიქესირის პროვინციის ქალაქ სინდირგიში დაფიქსირდა. ბიძგები ადგილობრივი დროით 27 ოქტომბრის 22:48 საათზე მოხდა.

მიწისძვრა იგრძნობოდა სტამბოლში, ასევე მეზობელ პროვინციებში — ბურსაში, მანისასა და იზმირში.

თურქეთის შინაგან საქმეთა მინისტრის, ალი იერლიკაიას თქმით, სინდირგიში ჩამოინგრა სულ მცირე სამი დაუსახლებელი შენობა და ორსართულიანი მაღაზია, რომლებიც წინა მიწისძვრის შედეგად უკვე დაზიანებული იყო .

ბალიქესირის გუბერნატორის, ისმაილ უსტაოღლუს ინფორმაციით, 22 ადამიანმა დაზიანებები მიიღო.

"ჯერჯერობით ადამიანის მსხვერპლი არ გამოვლენილა, თუმცა სამაშველო სამუშაოები გრძელდება," — განუცხადა სინდირგის რაიონის ადმინისტრატორმა, დოგუქან ქოიუნჯუმ.

სინდირგიში აგვისტოშიც 6.1 მაგნიტუდის მიწისძვრა მოხდა, რომელსაც ერთი ადამიანი ემსხვერპლა და ათეულობით ადამიანი დაშავდა. თურქეთი აქტიურ გეოლოგიურ ზონაში მდებარეობს, სადაც მიწისძვრები ხშირია. 2023 წელს 7.8 მაგნიტუდის კატასტროფულმა მიწისძვრამ თურქეთში 53,000-ზე მეტი ადამიანი იმსხვერპლა და სამხრეთ და სამხრეთ-აღმოსავლეთის 11 პროვინციაში ასიათასობით შენობა გაანადგურა ან დააზიანა.