22 ოქტომბერს, სტამბაში, Breakfast with Deskmates -ის დამსწრეები ამჯერად ხელოვნურმა ინტელექტმა გააერთიანა. D Block-ის დილის შეხვედრების სერია თიბისი ბიზნესისა და Visa-ს მხარდაჭერით, ყოველ მეორე ოთხშაბათს ტარდება. შეხვედრების მიზანი საერთო ინტერესებისა და თემების გარშემო საერთო სივრცეში მომუშავე ადამიანების დაკავშირება იყო.

ამჯერად, დისკუსია ეხებოდა ერთ-ერთ ყველაზე აქტუალურ თემას — Agentic AI-სა და მის გავლენას თანამედროვე ბიზნესმოდელებზე.

ტექსფეროს წარმომადგენლების გარდა, დამსწრეთა შორის იყვნენ ისეთებიც, ვისთვისაც ეს თემა ახალი იყო. Agentic AI ხელოვნური ინტელექტის სისტემაა, რომელსაც შეუძლია არა მხოლოდ პასუხის გაცემა, არამედ დამოუკიდებლად მოქმედება, გადაწყვეტილებების მიღება და მიზნის მიღწევა ადამიანის ჩარევის გარეშე.

თუ ჩვეულებრივი AI მხოლოდ ინსტრუქციებს ასრულებს, Agentic AI-ს შეუძლია დაგეგმოს, შეაფასოს შედეგები და თვითონ შეცვალოს მოქმედების სტრატეგია. ასეთმა სისტემებმა შეიძლება გარდაქმნას მომხმარებელთა მომსახურება, ფინანსური ოპერაციები, ლოგისტიკა და მარკეტინგიც კი.

დისკუსიის მოდერატორის, ანტრეპრენერის დავით ციცქიშვილის თქმით, Agentic AI-ს დანერგვის მაჩვენებელი გლობალურად 6 %-ია, თუმცა მომდევნო 5 წელიწადში 40 %-მდე გაიზრდება. ეს კი 50 მილიარდიან ბაზარს ქმნის და იმ კომპანიებს, რომლებიც პროცესში ადრე ჩაერთვებიან, აშკარა უპირატესობას მიანიჭებს.

“ნებისმიერ სფეროში, სადაც უნდა მუშაობდეთ, თუ არ დაიწყებთ ხელოვნური ინტელექტის დანერგვას, უბრალოდ დაგაგვიანდებათ და თქვენი პროდუქტი არარელევანტური გახდება”, — აღნიშნა დავით ციცქიშვილმა.

“არ იცვლება მხოლოდ მომხმარებლის მოთხოვნა — მაღალი ხარისხი და ეფექტურობა“, — უთხრა დამსწრეებს ირაკლი მირზიკაშვილმა, BRIANO-ს დამფუძნებელმა და საკუთარი გამოცდილება გაუზიარა.

Briano ქმნის პლატფორმას, რომელიც კომპანიებს ეხმარება მომხმარებელთა მხარდაჭერის პროცესის ავტომატიზაციაში ხმოვანი და ტექსტური კომუნიკაციით, მაღალი ხარისხის ე.წ. production-grade აგენტების გამოყენებით.

“სამი წლის წინ, როდესაც ხელოვნური ინტელექტი საცალო ბაზრისთვის ხელმისაწვდომი გახდა, მივხვდით, რომ არსებული მიდგომები ძალიან მალე აღარ იარსებებდა. ე.წ. touch და click გასული საუკუნის 70-იანი წლების მონაპოვარია და ბოლო 50 წელი დომინირებდა. მას შემდეგ რაც Agentic AI არსებობს, ადვილი მისახვედრია, რომ არსებული ყველა ტექნოლოგია უბრალოდ ჩაიკარგება, რადგან ასეთ პროდუქტს, როგორც მეგობრებს ისე დაველაპარაკებით, ჩვეულებრივი ენით“. — აღნიშნა მან.

5 ნოემბერს, ოთხშაბათს, D Block-ის დილის შეხვედრების შემდეგი სერია გაიმართება და საერთო სივრცეში მომუშავე ადამიანები ამჯერად სხვა საინტერესო თემის გარშემო გაერთიანდებიან.