აფხაზეთის დე-ფაქტო პრეზიდენტმა რაულ ხაჯიმბამ განაცხადა, რომ ზღვისპირა ქალაქ ოჩამჩირეს სახელს არ შეუცვლიან. ინფორმაციას ამის შესახებ სააგენტო Abkhazinform ავრცელებს.

ხაჯიმბას თქმით, ქალაქის სახელწოდებაში 1 ასოს ცვლილება გარკვეული თანხა დაჯდებოდა, რისი საშუალებაც დე-ფაქტო აფხაზეთის ბიუჯეტს არ აქვს. აფხაზი კანონმდებლების მიერ 15 ივნისს პირველი მოსმენით მიღებულ კანონპროექტში ეწერა, რომ ოჩამჩირეს სახელწოდებაში პირველი ასო "ო" შეიცვლებოდა "ა" ასოთი. ინიციატორები აღნიშნულს "ისტორიული სამართლიანობის" აღდგენად აფასებდნენ.

დე-ფაქტო აფხაზი კანონმდებლების ამ ინიციატივას გაღიზიანება მოჰყვა ადგილობრივი მოსახლეობის ნაწილში. Abkhazinform-ის ცნობით, მოქალაქეთა ნაწილი აცხადებდა, რომ ოჩამჩირეში გაცილებით სერიოზული პრობლემები არსებობს, ვიდრე ეს ქალაქის სახელწოდების შეცვლაა.

აფხაზ პოლიტიკოსებს ოჩამჩირეს გარდა სახელის შეცვლა კიდევ 90-მდე დასახლებისთვის სურდათ.