3 ოქტომბერს ტეილორ სვიფტმა ახალი ალბომი — The Life Of A Showgirl გამოუშვა, რომელმაც გამოსვლის დღიდან უამრავი რეკორდი მოხსნა და არანაკლები გამოხმაურება დაიმსახურა. ალბომმა საზოგადოება მრავალ საკითხზე აალაპარაკა, თუმცა ერთ-ერთი მთავარი ამბავი, რომელმაც პოპ-კულტურა მოიცვა, ტეილორ სვიფტისა და Charli XCX-ის "დაპირისპირებაა".

ახალი ალბომის მოსმენის შემდეგ ყველასთვის აშკარა იყო, რომ მისი ერთ-ერთი სიმღერა — Actually Romantic არა ჩვენთვის უცნობ, საიდუმლო პიროვნებას ან მოვლენას, არამედ ერთ კონკრეტულ პოპ-ვარსკვლავს, Charli XCX-ს ეძღვნებოდა. იმის მიუხედავად, რომ სიმღერაში ჩარლი პირდაპირ არაა ნახსენები და ტეილორს ეს თეორია არ დაუდასტურებია, ამბის ნამდვილობის, როგორც სვიფტის, ასევე ჩარლის ფანებსაც სჯერათ.

როგორ დაიწყო ეს დაპირისპირება და რატომაა ყველა დარწმუნებული, რომ Actually Romantic ჩარლის ეძღვნება?

გასულ წლამდე 2 პოპ-ვარსკვლავს შორის მხოლოდ პატივისცემა და კარგი დამოკიდებულება არსებობდა (ყოველ შემთხვევაში, საჯაროდ მხოლოდ ეს ჩანდა), თუმცა მათ შორის არსებული დაძაბულობა სინამდვილეში წლების განმავლობაში გროვდებოდა.

2018

2018 წელს Charli XCX ტეილორ სვიფტის მუსიკალური ტურნეს გამხსნელი შემსრულებელი იყო. ყოველ საღამოს, სანამ ტეილორი დაიკავებდა სცენას, მისი ფანების წინაშე ჩარლი საკუთარ სიმღერებს ასრულებდა. მომღერლებმა ტეილორის სიმღერა Shake It Off-იც შეასრულეს ერთად, თუმცა მოგვიანებით, ჩარლიმ ეს გამოცდილება არც თუ ისე დადებითად შეაფასა: "ძალიან მადლიერი ვარ, რომ ტეილორმა თავის ტურნეზე დამპატიჟა, მაგრამ, როგორც ხელოვანი, თავს ისე ვგრძნობდი, თითქოს 5 წლის ბავშვების წინაშე მქონდა ხოლმე კონცერტი". ამ კომენტარმა, რა საკვირველია, ტეილორის ფანებში უკმაყოფილება გამოიწვია, თუმცა თავად ტეილორს საკუთარი რეაქცია საჯაროდ არ გამოუხატავს. მოგვიანებით ჩარლიმ ტეილორის ფანებს მოუბოდიშა.

2023

2023 წელს ვარსკვლავების გზები ისევ გადაიკვეთა. 2022 წელს Charli XCX-მა ცნობილი პოპ-როკ ბენდის, The 1975-ის დრამერთან, ჯორჯ დანიელთან დაიწყო ურთიერთობა. 2023 წლის მაისში კი ტეილორმა დაიწყო ურთიერთობა ბენდის წამყვან მომღერალ მეთიუ ჰილისთან. შესაბამისად, 2023 წლის ზაფხულში ჩარლი და ტეილორი ერთმანეთს არაერთხელ შეხვდნენ, უნდოდათ ეს თუ — არა. სვიფტისა და მეთიუს ურთიერთობა მხოლოდ 2 თვე გაგრძელდა, ჩარლი და ჯორჯი კი გასულ ზაფხულს დაქორწინდნენ.

2024, ზაფხული

2024 წლის ივნისში Charli XCX-მა ახალი ალბომი Brat გამოუშვა, რომელიც ზაფხულის საუნდტრეკი გახდა. ალბომში ჩარლი აქტიურად განიხილავდა მის ურთიერთობას მუსიკალურ ინდუსტრიასთან და სხვა პოპ-ვარსკვლავებთან. ამის მაგალითია სიმღერა Girl, so confusing, რომელიც ცნობილ ახალ ზელანდიელ მომღერალ Lorde-ს ეძღვნება და საუბრობს უხერხულობაზე და გაუგებრობაზე, რომელიც ორ ქალ მუსიკოსს შორის შეიძლება გაჩნდეს, რადგან საზოგადოება და მედია მათ მუდმივად ერთმანეთს ადარებს. მოგვიანებით, Lorde-მა და ჩარლიმ ამ სიმღერის საერთო რემიქსი ჩაწერეს და მათ შორის არსებული დაძაბულობა მოაგვარეს.

თუმცა, ალბომში არსებულ მეორე სიმღერას, რომელიც მსგავს შინაარსს ატარებდა, ასეთი მეგობრული დასასრული არ ჰქონია. ჩარლის სიმღერა Sympathy Is a Knife (თანაგრძნობა დანაა) კომპლექსებზე საუბრობს, რომლებიც ჩარლის მასზე ბევრად პოპულარულ მომღერალთან ერთად ყოფნისას უჩნდება. ფანებმა მალევე ამოიცნეს, რომ სიმღერაში ნახსენები მომღერალი, რომელსაც ჩარლი თავის თავს ადარებს, ტეილორ სვიფტია. სიმღერის ტექსტში ვკითხულობთ: "ერთი გოგო კომპლექსებს მიჩენს… რომც ვეცადო, ვერ გავხდები ის, მისი საპირისპირო ვარ". მიუხედავად იმისა, რომ ჩარლი წარმატებული მუსიკოსია, როგორც ჩანს, ფიქრობს, რომ ტეილორის წარმატებას ვერასდროს მიაღწევს, რაც სვიფტთან ერთად დროის გატარებისას ცუდად აგრძნობინებს თავს:

Brat ჩარლისთვის ძალიან წარმატებული ალბომი აღმოჩნდა. თუმცა, როცა გამოსვლის პირველ კვირას დიდი ბრიტანეთის ალბომების რეიტინგში პირველი ადგილი უნდა დაეკავებინა, ტეილორმა თავისი ალბომის ახალი ვერსიები გამოუშვა და ბრიტანელ მომღერალს რეიტინგის სათავე არ დაუთმო. მალევე, ჩარლიმ კონცერტი გამართა, რომლის დროსაც მისი ფანები ერთხმად ყვიროდნენ "ტეილორი მკვდარია". მოვლენას ჩარლი ინსტაგრამზე გამოეხმაურა: "ვინც ამას აკეთებთ, გთხოვთ, შეწყვიტეთ, ონლაინაც და ჩემს კონცერტებზეც… ამას ვერ ავიტან".

მოისმინეთ Charli XCX-ის სიმღერა Sympathy Is a Knife:

2024, შემოდგომა

2024 წლის ოქტომბერში Charli XCX-მა ალბომის წარმატება ჟურნალ New York Magazine-ის გარეკანზე აღნიშნა. ჟურნალმა სხვა ცნობილ ადამიანებთან ერთად ტეილორ სვიფტსაც სთხოვა, რომ ჩარლის ალბომზე კომენტარი გაეკეთებინა: "მას შემდეგ, რაც 2011 წელს პირველად მოვისმინე ჩარლის სიმღერა Stay Away, მისი მელოდიური მგრძნობელობით გაოგნებული ვარ. მისი წერის სტილი ყოველთვის არარეალური და ახალია. ვერასდროს გამოიცნობ, რას გაუკეთებს სიმღერას. მიხარია, რომ მისი შრომა ფასდება" — თქვა ტეილორმა.

2025

ტეილორ სვიფტს ვერც 2025 წლის დასაწყისში შეამჩნევდით, რომ Charli XCX-ის მიმართ უარყოფითი დამოკიდებულება ჰქონდა — 2 თებერვალს, გრემის დაჯილდოებაზე, პოპ-ვარსკვლავი ჩარლის შესრულებისას შამპანურით ხელში ცეკვავდა.

თუმცა, 3 ოქტომბერს, ტეილორის ალბომის გამოსვლასთან ერთად, მათ შორის არსებული დაძაბულობა აშკარა გახდა. ტეილორის ალბომის მე-7 სიმღერას Actually Romantic ეწოდება (აღსანიშნავია, რომ Brat-ის მე-7 სიმღერის სახელია Everything Is Romantic).

სიმღერა იწყება სიტყვებით:

"Actually Romantic იმ სიტუაციას ეხება, როცა აანალიზებ, რომ ვიღაცას შენთან ცალმხრივი ომი აქვს გამოცხადებული და ამაზე არაფერი იცოდი. ეს სიმღერა სიძულვილს სიყვარულად იღებს. როგორი სასიამოვნოა, რომ ვიღაც შენზე ამდენს ფიქრობს და არც კი იცოდი. თუ კარგად დაფიქრდები, სინამდვილეში, საკმაოდ რომანტიულია", — ამბობს სვიფტი სიმღერაზე.

საზოგადოების ნაწილი ტეილორს აკრიტიკებს და თვლის, რომ ამ სიმღერით მომღერალი მასზე პატარა არტისტს "ჩაგრავს", თუმცა სვიფტის ფანები ფიქრობენ, რომ ჩარლიმ სამართლიანი პასუხი მიიღო. თავად Charli XCX კი ტეილორის სიმღერას ჯერ-ჯერობით არ გამოხმაურებია.

მოისმინეთ ტეილორ სვიფტის სიმღერა Actually Romantic: