"ჩვენთვის მნიშვნელოვანია თავად ფაქტი, რომ გერმანიის ელჩი გაწვეული იქნა", — ამის შესახებ ოცნების პარლამენტის თავმჯდომარემ, შალვა პაპუაშვილმა საქართველოში გერმანიის ელჩის, პეტერ ფიშერის გაწვევაზე საუბრისას განაცხადა. მან იმედი გამოთქვა, რომ ეს არის "სიგნალი იმისა, რომ გერმანიის მთავრობაში დაფიქრდნენ და გაანალიზეს, რომ მოქმედი ელჩის საქმიანობით მხოლოდ სირთულეები იქმნებოდა ხელისუფლებებს შორის ურთიერთობებში".

"როგორც ჩანს, გერმანიის ხელისუფლებაში დაფიქრდნენ იმაზე, რომ მოქმედი ელჩი. სამწუხაროდ, ნაცვლად იმისა, რომ ასრულებდეს მთავრობებს შორის ხიდის როლს ჩვენს ქვეყნებსა და მთავრობებს შორის კედლის როლი აირჩია. ვხედავდით მისი მხრიდან საქართველოს ხელისუფლებაზე თავდასხმებს, ვხედავდით მხარდაჭერას რადიკალური ჯგუფების მიმართ, რაც სამწუხარო იყო. 30-წლიანი განსაკუთრებული პარტნიორობა, სამწუხაროდ, გერმანიის ელჩის დავიდა ხელში ძალიან დაბალ ნიშნულზე. ამიტომ, იმედი გვაქვს, რომ ეს არის გადატვირთვის სიგნალი. რა თქმა უნდა, ჩვენ მზად ვართ, რომ ჩვენი ურთიერთობები გერმანიასთან იქ დაბრუნდეს, სადაც იმსახურებს, რომ იყოს.

…ჩვენთვის მნიშვნელოვანია თავად ფაქტი, რომ გერმანიის ელჩი გაწვეული იქნა. დანარჩენი სიღრმეებში აღარ შევალ. ჩვენი პოზიციები ცნობილი არის, მათ შორის გერმანიის ელჩის საქმიანობასთან დაკავშირებით, რაც არაერთხელ გვითქვამს. ჩვენ ამ პოზიციაზე ვრჩებით, გვაქვს ამ პოზიციის არგუმენტები, ჩვენ კი არა, მთელი საზოგადოება ხედავდა ამ ყველაფერს. განცხადებებს უკვე დიდად არ ჩავუღრმავდებით. ჩვენთვის მნიშვნელოვანია, რომ მოხდეს გადააზრება. მნიშვნელოვანია, რომ ელჩი ასრულებდეს არა ხიდის როლს და არა კედლის როლს. ვფიქრობ ეს ყველა ელჩისთვის კარგი მაგალითი უნდა იყოს იმისთვის, რომ დარჩნენ საკუთარი დიპლომატიის ფარგლებში, იზრუნონ იმაზე, რომ მათ წარმოდგენილ ქვეყანასა და საქართველოს შორის ურთიერთობისთვის იყვნენ ხიდი და არა კედელი.

…იმედი გვაქვს, რომ ეს არის სიგნალი იმისა, რომ გერმანიის მთავრობაში დაფიქრდნენ და გაანალიზეს, რომ მოქმედი ელჩის საქმიანობით მხოლოდ სირთულეები იქმნებოდა ხელისუფლებებს შორის ურთიერთობებში", — განაცხადა ოცნების პარლამენტის თავმჯდომარემ, შალვა პაპუაშვილმა

გერმანიამ ელჩი პეტერ ფიშერი საქართველოდან კონსულტაციებისთვის 19 ოქტომბერს გაიწვია. მათი განმარტებით, მათი ამ გადაწყვეტილების მიზეზი საქართველოს ხელისუფლების მიერ ევროკავშირის, გერმანიის და პირადად ელჩის წინააღმდეგ გაკეთებული განცხადებებია.