ევროპის სახალხო პარტია (EPP) განცხადებას აქვეყნებს, სადაც საქართველოში ავტორიტარიზმის სწრაფი ზრდისა და სრული კონსტიტუციური, პოლიტიკური და ადამიანის უფლებათა კრიზისის გამო შეშფოთებას გამოთქვამს.

ქართული ოცნების მიერ ბოლო პერიოდში გადადგმული ნაბიჯების გამო, EPP ქართველ ხალხს სოლიდარობას უცხადებს და მოითხოვს, რომ "ევროკავშირმა, მისმა წევრმა სახელმწიფოებმა, ეროვნულმა პარლამენტებმა და საპარლამენტთაშორისო ინსტიტუტებმა არ აღიარონ ქართული ოცნების ერთპარტიული პარლამენტის ან მის მიერ დანიშნული პრეზიდენტის ლეგიტიმურობა, ვინაიდან 2024 წლის ოქტომბრის საპარლამენტო არჩევნები ფუნდამენტურად გაყალბდა."

ევროპის სახალხო პარტია ყველა პოლიტიკური პატიმრის დაუყოვნებლივ გათავისუფლებასაც მოითხოვს და ქართულ ოცნებას ავტორიტარიზმისა და რუსეთის ორბიტისკენ სვლის გამო კიცხავს.

EPP პოლიციის სისასტიკისა და მშვიდობიან დემონსტრანტებზე ძალადობის შემთხვევების დამოუკიდებელი, გამჭვირვალე და მიუკერძოებელი გამოძიებისთვის შესაბამისი საერთაშორისო მექანიზმების გამოყენებას მოითხოვს.

EPP ვიზალიბერალიზაციის რეჟიმის სავარაუდო შეჩერების შესახებაც წერს და აღნიშნავს, რომ რეჟიმის შეჩერების შედეგებზე ქართული ოცნებაა პასუხისმგებელი.

"ქართული ოცნება სრულად არის პასუხისმგებელი იმ შედეგებზე, რაც შეიძლება საქართველოს მოქალაქეებისთვის ვიზალიბერალიზაციის რეჟიმის შეჩერებას მოჰყვეს ევროკავშირის რეგულაციის (EU) 2018/1806-ის მუხლი 8a(1)(h)-ის საფუძველზე; და მოუწოდებს ევროკომისიას, უზრუნველყოს, რომ ეს ზომა მიზნობრივად იქნეს გამოყენებული პასუხისმგებელი პირებისა და მათი ოჯახის წევრების მიმართ", — წერია გავრცელებულ განცხადებაში.

EPP სანქციების დაწესებასთან დაკავშირებითაც წერს. მათი განმარტებით, ევროკავშირის წევრმა ქვეყნებმა "მმართველი რეჟიმის პოლიტიკურ, ფინანსურ და პროპაგანდისტულ ელიტებს, ასევე იმ პირებს, რომლებიც მონაწილეობდნენ არჩევნების გაყალბებაში", სანქციები უნდა დაუწესონ.

"მოითხოვს, რომ ევროპულმა საბჭომ და ევროკავშირის წევრმა სახელმწიფოებმა დააწესონ პერსონალური სანქციები მმართველი რეჟიმის პოლიტიკური, ფინანსური და პროპაგანდისტული ელიტების, ასევე იმ პირების მიმართ, რომლებიც მონაწილეობდნენ არჩევნების გაყალბებაში, ადამიანის უფლებათა დარღვევებში და პოლიტიკური ოპონენტებისა და აქტივისტების დევნაში;

EPP ქართული ოცნებისგან მოითხოვს, უარი თქვას საკონსტიტუციო სასამართლოში საჩივრის შეტანის განზრახვაზე, რომელიც მიზნად ისახავს ერთიანი ნაციონალური მოძრაობისა და სხვა დემოკრატიული პარტიების არაკონსტიტუციურად ცნობას", — წერია განცხადებაში.

EPP ქართულ ოცნებას მოუწოდებს, "დაადგინოს ახალი, თავისუფალი, სამართლიანი და კონკურენტუნარიანი საპარლამენტო არჩევნების ჩატარების კონკრეტული თარიღი, უზრუნველყოს სახელმწიფო ინსტიტუტების, მათ შორის ცენტრალური საარჩევნო კომისიის, თავისუფალი მოქმედება პოლიტიკური ჩარევის გარეშე და არა სახელმწიფო ტყვეობის პირობებში."