ისრაელის თავდაცვის ძალებმა ღაზას სექტორში ცეცხლის შეწყვეტა გამოაცხადეს. ის ადგილობრივი დროით შუადღისას დაიწყო. მძევლებისა და პატიმრების გათავისუფლება შეთანხმების ძალაში შესვლიდან 72 საათის განმავლობაში იგეგმება.

ისრაელისა და პალესტინური დაჯგუფება "ჰამასის" ოფიციალურმა პირებმა, რომელიც აშშ-სა და ევროკავშირის მიერ ტერორისტულ ორგანიზაციად არის გამოცხადებული, ხუთშაბათს ცეცხლის შეწყვეტის შესახებ შეთანხმებას ხელი მოაწერეს. ეს აშშ-ის პრეზიდენტის, დონალდ ტრამპის მიერ შემოთავაზებული სამშვიდობო გეგმის პირველი ეტაპია.

საღამოსთვის, ისრაელის თავდაცვის ძალები, სავარაუდოდ, ღაზას სექტორის მნიშვნელოვანი ნაწილიდან გავიდნენ. როგორც Times of Israel წერს, ისრაელის არმია ღაზას სექტორის ნახევარზე ოდნავ მეტს შეინარჩუნებს კონტროლს, ძირითადად ურბანული ტერიტორიების გარეთ.

შეთანხმების პირველი ეტაპი ჰამასისგან მოითხოვს 20-ვე ისრაელელი მძევლის გათავისუფლებას და მათი დატყვევების შემდეგ გარდაცვლილთა ცხედრების გადაცემას. წინასწარი ინფორმაციით, ეს რიცხვი 28-ია. სანაცვლოდ, ისრაელმა უნდა გაათავისუფლოს დაახლოებით 250 პალესტინელი, რომლებიც სამუდამო პატიმრობის სასჯელს იხდიან და კიდევ 1700 ადამიანი, რომლებიც ღაზას სექტორში ომის დაწყების შემდეგ არიან დაკავებულნი. გაცვლის დრო და რაოდენობა შესაძლოა პროცესის განმავლობაში შეიცვალოს. პარასკევს დილის მდგომარეობით გასათავისუფლებელი პატიმრების სია საბოლოოდ დადგენილი არ იყო. ისრაელი იტოვებს უფლებას, შეცვალოს იგი შეთანხმების მიღწევის შემდეგ, თუ ჰამასი ვერ შეძლებს ყველა ცხედრის ამოღებას.

გაცვლის შემდეგ, მხარეები ტრამპის გეგმის შემდეგ ნაბიჯებზე უნდა გადავიდნენ, რომელიც რეგიონში გრძელვადიანი მშვიდობის დამყარებას, მათ შორის ჰამასის ხელისუფლებიდან ჩამოშორებას ითვალისწინებს. ამ სფეროში ბევრ საკითხზე ჯერ შეთანხმება არ არის მიღწეული.