სოციოლოგი იაგო კაჭკაჭიშვილი ოცნების წარმომადგენლების, ირაკლი კობახიძისა და შალვა პაპუაშვილის მხრიდან პროფესორ მარინა ჩიტაშვილისადმი გაჟღერებულ ბრალდებებს ეხმაურება. ის წერს, რომ "არასწორი კი არა, კარიკატურულია მარინეში ვინმემ მოძალადე პროფესორი დაინახოს!"

"კუდიანებზე ნადირობას" აკადემიურ სივრცეში მარინე ჩიტაშვილით იწყებთ?

ფრთხილად იყავით — ფეხი არ დაიბიჯოთ და თქვენი ბრძოლა ბუმერანგის ეფექტით არ დასრულდეს.

უბრალოდ არასწორი კი არა, კარიკატურულია მარინეში ვინმემ მოძალადე პროფესორი დაინახოს!

ოდნავ მაინც თუ გადაფურცლავთ მის ბიოგრაფიას, მასში მხოლოდ პროფესიონალს და დარგის ევროპულ სტანდარტებზე ამყვანს დაინახავთ!

განსაკუთრებით ველოდები "ქართული ოცნების" ამჟამინდელ მომხრეთა გამოხმაურებას, ვისთვისაც იდეოლოგიურად და პოლიტიკურად საპირისპირო ჯგუფთან კონსენსუსის ერთ-ერთ წყაროს სწორედ ქალბატონი მარინეს პროფესიონალიზმის აღიარება წარმოადგენს (ყოველ შემთხვევაში, აქამდე ასე იყო). მინდა ვიქონიო იმედი, რომ არ დაიმალებით!

ჩემი სოლიდარობა პროფ. მარინე ჩიტაშვილს!", — წერს იაგო კაჭკაჭიშვილი.

შეგახსენებთ, რომ "პირველ არხის" ეთერში ოცნების პარლამენტის თავმჯდომარემ, შალვა პაპუაშვილმა 4 ოქტომბერს თბილისში განვითარებულ მოვლენებზე საუბრისას თბილისის სახელმწიფო უნივერსიტეტის პროფესორს, ფსიქოლოგ მარინა ჩიტაშვილს "რადიკალური ოპოზიციის ერთ-ერთი პროპაგანდისტი" უწოდა.

ქართული ოცნების პრემიერმა, ირაკლი კობახიძემ ბრიფინგზე, ტელეკომპანია იმედის ჟურნალისტის დასმული კითხვის საპასუხოდ, თსუ-ის პროფესორ მარინა ჩიტაშვილზე საუბრისას თქვა, რომ საუნივერსიტეტო სისტემაში "ძალიან მძიმე, ტრაგიკული მდგომარეობაა".

"ტრაგიკული მდგომარეობაა ჩვენს საუნივერსიტეტო სისტემაში, რაც ძალიან მძიმეა. როგორ შეიძლება, ასეთი ადამიანები ასწავლიდნენ თბილისის სახელმწიფო უნივერსიტეტში. თუმცა, მინდა შეგახსენოთ, რომ თავის დროზე, როცა იყო ჩამოყალიბებული ავტორიტარული სისტემა, 2004-2012 წლებში ბოლომდე შეაღწია მაშინდელმა ავტორიტარულმა მმართველობამ უნივერსიტეტებში, მათ შორის თსუ-შიც.
მათ შორის, საკადრო საკითხებს ალაგებდა პირდაპირ მაშინდელი ავტორიტარული მმართველობა და ამის გამოძახილია, რომ მრავლად არიან დღესაც ასეთი ადამიანები უნივერსიტეტში, მათ შორის, სახელმწიფო უნივერსიტეტშიც. ეს არის ტრაგიკული მოვლენა", — თქვა კობახიძემ.

შალვა პაპუაშვილს მარინე ჩიტაშვილიც გამოეხმაურა. ის აცხადებს,რ ომ ევროინტეგრაცია იმიტომ უნდა, რომ ასეთი ბრალდებისათვის უჩივლებდა სასამართლოში ცილისწამებისთვის და საქმეს მოიგებდა.

"წარმოდგენა არ მქონდა თუ მე ვიყავი რადიკალური ოპოზიციის პროპაგანდისტი. საოცარი სიურპრიზია პარლამენტის თავმჯდომარისგან. ისე კონტექსტიდან ამოგლეჯილი ფრაზების გამოყენება თქვენი ძლიერი მხარეა თუ თქვენი აპარატის თუ პარტიის მრჩევლების. ეს მაინტერესებს მხოლოდ.

არცერთი სიტყვა არ მიმაქვს უკან ოღონდ ეს შედეგი გინდოდათ თქვენ მშვიდობიანი პროტესტის დისკრედიტაციისათვის...

იცით რატომ მინდა ევროინტეგრაცია? ასეთი ბრალდებისათვის გიჩივლებდით სასამართლოში ცილისწამებისთვის და მოგიგებდით სხვისი სახელის გამოყენებისა და აზრის შეგნებულად დამახინჯებისათვის პოლიტიკური ინტერესიდან გამომდინარე", — მიმართა ჩიტაშვილმა პაპუაშვილს.