სადახლოს პირველი, სადახლოს მეორე, თაზაკენდისა და მოლაოღლის საჯარო სკოლების მასწავლებლები და მოსწავლეები დილით, გაკვეთილების დროს, ქართული ოცნების საარჩევნო შეხვედარს დაესწრნენ, რის გამოც სასწავლო პროცესი ჩაიშალა. ამის შესახებ სადახლოს მეორე სკოლის პედაგოგის, ნათია მანია ფესიბუქის საკუთარ გვერდზე წერს.

მისი თქმით, სკოლის მე-10, მე-11, მე-12 კლასების მოსწავლეებსა და მე-9 კლასელების ნაწილს მესამე გაკვეთილის მერე მეცადინეობა აღარ ჩატარებიათ:

"სადახლოს კლუბში არათუ დასაჯდომი, ფეხზე დასადგომი ადგილიც კი არსად იყო. უხუცესები, მასწავლებლები და გოგონები ისხდნენ. პარტიული აქტივისტები, სოფლის ბიჭები, ჭაბუკები და უმუშევარი შუახნის მამაკაცები ფეხზე იდგნენ".

ის ასევე აღწერს, რომ კონცერტის გახსნის შემდეგ, მომღერლების უკან 41-ნომრიან ლურჯ ხალათებში ჩაცმული ათიოდე წლის ბავშვები ხუთჯვრიან და მუქ ლურჯ დროშებს აფრიალებდნენ.

ნათია მანია აღნიშნავს, რომ შეხვედრას განათლების, მეცნიერებისა და კულტურის კომიტეტის ერთ-ერთი წევრიც ესწრებოდა.

სადახლოს სკოლის დირექტორი, საიატ ხალილოვი ტელეკომპანია რუსთავი 2-თან საუბრისას ამბობს, რომ მას მერე რაც მოსწავლეებმა გაიგეს რომ კლუბში კონცერტი იქნებოდა, "გაიქცნენ და დაესწრნენ":

"მეც დაინტერესებული ვიყავი. ვუჭერთ მხარს ხელისუფლებას და ეს ყოველთვის ასე იყო. არ აქვს მნშვნელობა რომელი პარტიაა, როგორც ჩვენი მამები და ბაბუები იყვნენ ისე ვართ".

კენან ომანოვი, რომელიც მარნეულის რესურსცენტრის ხელმძღვანელია ამბობს, რომ აღნშნულ აფქტზე აქამდე არ იცოდნენ და ამას სკოლის დისციპლინური კომიტეტი განიხილავს.

განათლების მინისტრის, ალექსანდრე ჯეჯელავას თქმით, ყველა მსგავსი შემთხვევა, როცა არის ეჭვი მოსწავლეებისა და სასკოლო რესურსის პოლიტიკურ აგიტაციაში ჩართვის, ძალიან დეტალური მოკვლევის საგანია, თუმცა უფროსკლასელების პოლიტიკურ პროცესებში მონაწილეობასაც არ გამორიცხავს:

"რამდენიმე ასეთი შემთხვევა იყო და ზოგ შემთხვევაში ადმინისტრაციული ჯარიმა გამოიწვია, ზოგ შემთხვევაში საყვედური, გაფრთხილება. ამ შემთხვევაშიც გავერკვევით, თუმცა ისიც ხაზგასმით უნდა ვთქვათ, რომ ყველა პედაგოგს, ყველა დირექტორს და უფროს კლასელებს, მათ აქვთ უფლება მონაწილეობა მიიღონ, თავიანთი მოსაზრება გამოხატონ და მიიღონ მონაწილეობა პოლიტიკურ პროცესებში".

სასწავლო დაწესებულებებში მსგავსი შემთხვევები გასულ თვეშიც მოხდა. ქართული ოცნების დროშებით ბავშვებთან ფოტოს გამო, შუახევის მუნიციპალიტეტის სოფელ სხეფის საჯარო სკოლის მასწავლებელი, მარინა დარჩიძე 1 000 ლარით დაჯარიმდა.