ნაციონალური მოძრაობის წევრი გივი თარგამაძე, დღეს, 20 ივნისს, შსს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის სამმართველოში დაიბარეს. ამის შესახებ თარგამაძე საკუთარ ფეისბუკ გვერდზე წერს. მისი თქმით, დაკითხვის მიზეზი მის მიერ გუშინ გაკეთებული განცხადებაა, კანონიერი ქურდის დავით გერლიანის საქართველოს საზღვრის გადმოკვეთის შესახებ.

გუშინ, 19 მაისს, გივი თარგამაძემ სპეციალურ ბრიფინგზე განაცხადა, რომ ე.წ. კანონიერმა ქურდმა, დავით გერლიანმა (დათო სვანი) საქართველოს საზღვარი ისე გადმოკვეთა, რომ არ დაუკავებიათ. მისი თქმით, აღნიშნული პირი უკრაინიდან კერძოდ, ოდესიდან არის დეპორტირებული.

გივი თარგამაძის მიერ ფეისბუკზე ატვირთულ უწყებაში წერია, რომ მას პოლიციაში გამოსაკითხად იბარებენ დავით გერლიანის კანონიერი ქურდობის ფაქტზე დაწყებულ სისხლის სამართლის საქმესთან დაკავშირებით. დოკუმენტიდან ირკვევა, რომ გამოძიება დაწყებულია სისხლის სამართლის კოდექსის 223-ე პრიმა მუხლის მეორე ნაწილით. აღნიშნული გულისხმობს კანონიერი ქურდობას, რაც ისჯება თავისუფლების აღკვეთით ვადით შვიდიდან ათ წლამდე, ჯარიმით ან, ჯარიმის გარეშე.

შინაგან საქმეთა სამინისტროში On.ge-ს განუცხადეს, რომ აღნიშნულ საკითხზე დღის განმავლობაში გააკეთებენ განცხადებას.