ცხოველთა უფლებადამცველმა ცნობილმა ორგანიზაცია PETA-მ ("ადამიანები ცხოველებისადმი ეთიკური მოპყრობის მხარდასაჭერად") ანა ვინტურს ლონდონის მოდის კვირეულის წინ საჩუქარი გაუგზავნა. ჟურნალ Vogue-ის საერთაშორისო სარედაქციო ხელმძღვანელმა საჩუქრად შარფი მიიღო, რომელიც, არც მეტი, არც ნაკლები, PETA-ის დამფუძნებლის, ინგრიდ ნიუკირკის, თმისგანაა მოქსოვილი.

ამ ჟესტით, ორგანიზაცია მოდის ინდუსტრიას მოუწოდებს, წარმოებაში ქაშმირის გამოყენება შეწყვიტოს. სწორედ ამიტომ, "100 პროცენტით ადამიანის თმისგან დამზადებული შარფი" საგანგებოდ შეღებეს შავად, რათა იმ "შავბნელი რეალობისთვის გაესვათ ხაზი, თუ როგორ მხეცურად აცილებენ თხებს ბეწვს მათი ნების საწინააღმდეგოდ". PETA ამატებს, რომ გარემოსთვის საზიანო ქაშმირისგან განსხვავებით, ვინტურისთვის გაგზავნილი საჩუქარი ეკომეგობრულია. ორგანიზაციამ ინსტაგრამზე ხუმრობით ფოტომონტაჟიც გამოაქვეყნა, თითქოს, ვინტურს ლონდონის მოდის კვირეულზე მართლაც აქვს მორგებული მათი შარფი.

აღსანიშნავია, რომ ეს პირველი შემთხვევა არაა, როცა PETA ანა ვინტურს დაუპირისპირდა. ორგანიზაციის ხელმძღვანელი 1997 წელს ნიუ-იორკის ერთ-ერთი სასტუმროს რესტორანში მივიდა და ვინტურს, რომელიც იქ ვახშმობდა, თეფშზე მკვდარი ენოტი დაუგდო. მოგვიანებით, ნიუკირკი Vogue-ის ოფისშიც შეიჭრა და ტელეფონზე მიღებულ ზარებს პასუხობდა ფრაზით "ცხოველებისადმი სასტიკი მოპყრობის გამო დღეს დავიხურეთ". მაშინ ორგანიზაცია ჟურნალს ბეწვეულის პოპულარიზაციაში ადანაშაულებდა.

"მას შემდეგ ბევრმა წყალმა და ცხოველების სისხლმა ჩაიარა. კიდევ კარგი, დროც შეიცვალა და ხალხმა უკვე იცის, როგორ აწამებს ცხოველებს მოდის ინდუსტრია", — ამბობს ვინტურისთვის გაგზავნილ წერილში PETA-ის ხელმძღვანელი და ამტკიცებს, რომ თავისი თმისგან მოქსოვილი შარფი "სამშვიდობო შეთავაზებაა", — "ესაა უნიკალური, მდიდრული შარფი, რომელიც დამზადებულია ერთადერთი მისაღები ცხოველური მასალისგან, ადამიანის თმისგან. ეს თმა ჩემი ნებითაა გაცემული და ტკივილის ან მოკვლის გარეშეა მიღებული, რასაც ვერ ვიტყვით სხვა არსებებზე".

PETA-ის ცნობით, ჩინეთსა და მონღოლეთში, რომლებიც ქაშმირის უდიდესი მწარმოებლები არიან, "დამფრთხალ და ტკივილისგან აკივლებულ თხებს კოჭავენ და ლითონის ბასრი, ფოცხისებრი საჩეჩლით პარსავენ, აგლეჯენ კანს და ხშირად ღია ჭრილობებს უტოვებენ". ის თხები კი, რომლებიც სარგებლის მომტანად აღარ ითვლება, სასაკლაოზე მიჰყავთ.

მოდის ინდუსტრიაში ცხოველური წარმოშობის პროდუქციის გამოყენებას უკვე წლებია, ბევრი ადამიანი და ორგანიზაცია აპროტესტებს. მათ შორის არიან ვარსკვლავებიც, მაგალითად, მომღერალმა ბილი აილიშმა, რომელიც ვეგანია, 2021 წლის Met Gala-ზე ოსკარ დე ლა რენტას კაბა მხოლოდ იმ პირობით მოირგო, რომ მოდის სახლი ბეწვის გამოყენებაზე უარს იტყოდა. აილიშმა იმავეს გაკეთებისკენ მოუწოდა სხვა დიზაინერებსაც.

30 წლის განმავლობაში, PETA ასევე ახორციელებდა კამპანიას I'd Rather Go Naked Than Wear Fur ("მირჩევნია, შიშველმა ვიარო, ვიდრე ბეწვეული ჩავიცვა"), რომლის ფარგლებშიც ცნობილი ადამიანები კამერის წინ შიშველი პოზირებდნენ. კამპანიაში არაერთი ვარსკვლავი ჩაერთო, მათ შორის, პამელა ანდერსონი, ევა მენდესი და P!nk.

2018 და 2019 წლებში ბეწვეულის საკუთარ წარმოებაში გამოყენებაზე უარი თქვეს Chanel-მა და Prada-მ. 2021 წელს მათ შეუერთდა მოდის გიგანტი Kering თავისი ყველა ბრენდით. ამავე წელს ისრაელი მსოფლიოში პირველი ქვეყანა გახდა, რომელმაც მოდის ინდუსტრიაში ბეწვეულით ვაჭრობა საერთოდ აკრძალა.