პარტია დროას განცხადებით მათი წევრის, ნათია ლეთოდიანის სახლში აღსრულების ეროვნული ბიუროს წარმომადგენლები მივიდნენ. ისინი საპროტესტო აქციებზე გამოწერილი ჯარიმების გადაუხდელობის გამო, "ოჯახის საცხოვრებელი სახლის აღწერას და თანხის ასე ამოღებას აპირებენ," თუმცა, პარტიის განცხადებით, სახლი ნათია ლეთოდიანის სახელზე არ არის გაფორმებული.

"ჩვენი პარტიის წევრის, ნათია ლეთოდიანის სახლში, რამდენიმე წუთის წინ, აღსრულების ეროვნული ბიუროს წარმომადგენლები იმყოფებოდნენ.

განუცხადეს, რომ პროტესტში მონაწილეობისთვის გამოწერილი უკანონო ჯარიმების გადაუხდელობის გამო, მისი ოჯახის საცხოვრებელი სახლის აღწერას და თანხის ასე ამოღებას აპირებენ.

ამ დროისთვის მათ სახლი დატოვეს. ჩვენი ინფორმაციით, ორშაბათს დაბრუნდებიან ნივთების აღსაწერად. ცნობისთვის, სახლი ნათიას სახელზე არ არის გაფორმებული.
რუსული რეჟიმი მის ხელთ არსებული ყველა ხერხით ცდილობს აქტიური ადამიანების დაშინებას, მაგრამ მაინც არ გამოსდის!

არა რუსულ რეჟიმს! ბოლომდე!" — წერია პარტიის მიერ გავრცელებულ განცხადებაში.

აღნიშნულ ფაქტზე თავად ნათია ლეთოდიანმაც გააკეთა კომენტარი და აღნიშნა, რომ აღსრულების ბიუროს წარმომადგენელი ზაურ კაპანაძე იმ სახლში მივიდა, რომელიც მის ბაბუასა და ბებიას ეკუთვნის. მისივე თქმით, ჯარიმა, რომლის გადაუხდელობასაც მას ედავებიან 31 იანვარს აქციის დროს ზებრას გადაკვეთისას გამოუწერეს. ლეთოდიანი ჯარიმას არ აღიარებს და ამბობს, რომ მოსამართლის გადაწყვეტილება უკანონოა.

"დღეს აღსრულების ბიუროს წარმომადგენელი, ზაურ კაპანაძე მოვიდა ჩემს საცხოვრებელ სახლში, სადაც ვარ რეგისტრირებული და რომელიც მე არ მეკუთვნის. ეს არის ბაბუაჩემის და ბებიაჩემის სახლი.

მითხრეს, რომ 31 იანვარს ბათუმში, აქციის დროს ზებრას გადაკვეთის გამო გამოწერილი ჯარიმა, რომელიც, რა თქმა უნდა, არ გადავიხადე და არ ვაღიარებ არც ამ ჯარიმას და არც ბათუმის საქალაქო სასამართლოს მოსამართლის უკანონო გადაწყვეტილებას — 2 თვის წინ დამაყადაღეს და 2 თვის შემდეგ აღსრულება მოვიდა ჩემთან რომ დაეყადაღებინა და აღეწერა ყველა ის მოძრავი ნივთი, რომელიც ამ სახლში არის. დაწყებული ტელევიზორიდან, მაგიდა, სარეცხი მანქანა, მაცივარი თუ სხვა ნივთი", — თქვა პარტია დროას წევრმა.

ლეთოდიანის თქმით, ეს "რუსი ხელისუფლების მიერ" გამოგონილი "ტერორის ახალი სახეა", რომელიც არ იმოქმედებს.

"ეს არის რაღაც ახალი სტილი, ახალი ბრძანება — ეს არის ტერორის ახალი სახე რუსი ხელისუფლების მიერ მოგონილი, რომელიც, რა თქმა უნდა, ჩვენზე არ იმოქმედებს და ვერ შეგვაშინებენ.

მე ვთხოვე ამ ადამიანს, რომ ორშაბათამდე მოეცა დრო, რადგან კონსულტაციები უნდა გავიარო ადვოკატთან და ორშაბათს ველოდები მათ ვიზიტს, რათა აღიწეროს ყველა ნივთი, რაც ბაბუაჩემის და ბებიაჩემის სახლშია და არ ვიცი, რა ბედი ეწევა ამ ნივთებს", — თქვა ნათია ლეთოდიანმა.