თბილისის მერის, კახა კალაძის თქმით გაეროში მიხეილ ყაველაშვილის "გამოსვლას არანაირი წუნი და ნაკლი არ ჰქონდა" და ის საქართველოს ინტერესებს ემსახურებოდა.

"პრეზიდენტს ძალიან მნიშვნელოვანი გამოსვლა ჰქონდა, სადაც აბსოლუტურად დეტალურად გააჟღერა ყველა ის მთავარი მესიჯი, რომელიც ჩვენი ქვეყნისთვის იყო მნიშვნელოვანი. საუბარი იყო ოკუპაციაზე, მშვიდობის როლზე. პრეზიდენტის გამოსვლას არანაირი წუნი და ნაკლი არ ჰქონდა, ის ემსახურებოდა ჩვენი ქვეყნის ინტერესს და მომავალს", — განაცხადა კახა კალაძემ.

ჟურნალისტის კითხვაზე — რატომ არ ახსენა პრეზიდენტმა უშუალოდ რუსეთი ოკუპაციაზე საუბროს დროს, კალაძე ამბობს, რომ ეს ყველაფერი სპეკულაციებია.

"აბა, ვისგან არის ოკუპირებული, იცით კიდევ ვინმე რუსეთის გარდა ოკუპანტი? სხვა კიდევ ვიცი ვინმე არის რუსეთის გარდა ოკუპანტი? ტყუით. ნუ იტყუებით, რაღაც სისულელეებს საუბრობთ, რომელიც გაჯერებულია მხოლოდ და მხოლოდ ტყუილით. პრეზიდენტმა ყველაფერს მკაფიოდ გაუსვა ხაზი. მკაფიოდ ისაუბრა იმაზე, რომ ჩვენი ქვეყნის ტერიტორიები არის ოკუპირებული. არ იცით ვის მიერ? სხვა ვინმესგან ვართ ოკუპირებულები? ნუ სპეკულიანტობთ. ეს არის სპეკულაციები. ეს არის სპეკულაციები. სხვათა შორის, ის, რომ ჩვენი ქვეყნის ტერიტორიები ოკუპირებულია, თქვენი ბრალეულობაც არის — რადიკალების ხელშეწყობით და იმ პოლიტიკით, რომელსაც ახორციელებდით, მივიღეთ ის, რომ დავკარგეთ ტერიტორიები დამატებით. ეს ძალიან მძიმეა. შესაბამისად, უნდა გავაგრძელოთ ის პოლიტიკა, რომელსაც ახორციელებს "ქართული ოცნება — დემოკრატიული საქართველო", უნდა დავიცვათ ჩვენი ქვეყნის ინტერესები და ყველაფერი გავაკეთოთ იმისთვის, რომ აღვადგინოთ ქვეყნის ტერიტორიული მთლიანობა", — განაცხადა კახა კალაძემ.