შინაგანს საქმეთა სამინისტროს მიერ გავრცელებული ინფორმაციით, პირი, რომელიც 44 წლის კაცს ხილ-ბოსტნეულის მაღაზიაში მტვირთავად ამუშავებდა და ანაზღაურებას არ უხდიდა ტრეფიკინგის ბრალდებით დააკავეს.

უწყების ინფორმაციით, 1971 წელს დაბადებული ნ.გ მატერიალურ გაჭირვებაში მყოფ 1981 წელს დაბადებულ ი.შ-ზე ფიზიკურად, ფსიქოლოგიურად ძალადობდა და მოწყალების თხოვნას აიძულებდა, რის შემდეგაც თანხას თავად ეუფლებოდა.

"გამოძიებით დადგინდა, რომ ნ.გ.-მ ფინანსური სარგებლის მიღების მიზნით, მატერიალურ გაჭირვებაში მყოფი 1981 წელს დაბადებული ი.შ. გადაიბირა, რომელსაც ფიზიკური და ფსიქოლოგიური ძალადობის გამოყენებით აიძულებდა მის კუთვნილ ხილ-ბოსტნის მაღაზიაში მტვირთავად ემუშავა, რის სანაცვლოდაც თანხას არ უხდიდა.

ასევე დგინდება, რომ მას შემდეგ, რაც ი.შ. მაღაზიაში მუშაობას დაასრულებდა, ბრალდებულის მითითებით თბილისში, ერთ-ერთ ქუჩაზე მდებარე შუქნიშანზე გაჩერებული ავტომობილების მძღოლებისგან მოწყალებას ითხოვდა, ხოლო ამ გზით გამომუშავებულ თანხას ნ.გ. სრულად ეუფლებოდა", — წერია შსს-ს განცხადებაში.

გამოძიება საქართველოს სისხლის სამართლის კოდექსის 143-ე პრიმა მუხლის პირველი ნაწილით მიმდინარეობს, რაც 12 წლამდე ვადით თავისუფლების აღკვეთას ითვალისწინებს.