აშშ-ში საქართველოს ელჩის, თამარ ტალიაშვილის ცნობით, ნიუ-იორკში მიხეილ ყაველაშვილმა "კომუნიკაცია გამართა დონალდ ტრამპთან". ამის შესახებ ინფორმაციას სამთავრობო ტელეკომპანია "იმედი" ავრცელებს. მათი ცნობით, "მიხეილ ყაველაშვილს ასევე კომუნიკაცია ჰქონდა მსოფლიოს სხვადასხვა ლიდერთან".

"საქართველოს პრეზიდენტი, დონალდ ტრამპის მიწვევით, დაესწრო ოფიციალურ მიღებას. ეს ღონისძიება გაიმართა აშშ-ის პრეზიდენტის და პირველი ლედის სახელით. აღსანიშნავია, რომ მიღების ფარგლებში საქართველოს პრეზიდენტმა საზეიმო შეხვედრა, კომუნიკაცია გამართა დონალდ ტრამპთან", — აღნიშნა თამარ ტალიაშვილმა.

მისივე თქმით, "მიხეილ ყაველაშვილს ასევე კომუნიკაცია ჰქონდა მსოფლიოს სხვადასხვა ლიდერთან".

"მინდა, ხაზი გავუსვა იმ გარემოებას, რომ ამ ოფიციალური მიღების ფარგლებში საქართველოს პრეზიდენტი შეხვდა აშშ-ის მთავრობის მაღალი რანგის წარმომადგენლებს. ეს კომუნიკაცია იყო მეგობრული, პოზიტიური გზავნილებით. ოფიციალური მიღების ფარგლებში აშშ-ის პრეზიდენტმა მიმართა დამსწრე საზოგადოებას. ამ ღონისძიებაში ასევე მონაწილეობას იღებდნენ მსოფლიოს მრავალი ქვეყნის ლიდერები. ასევე, მათთან იყო კომუნიკაცია და ინტერაქცია", — განაცხადა ელჩმა.

მიხეილ ყაველაშვილი გაეროს გენერალურ ასამბლეაზე სიტყვით ხვალ, 25 სექტემბერს გამოვა.