25 სექტემბერს, 19:00-ზე, განათლების სამინისტროსთან დაპატიმრებული პედაგოგის, ნინო დათაშვილის მხარდასაჭერი აქცია დაიგეგმა.

ორგანიზატორების განცხადებით, ოცნებამ პატიმრობის პერიოდში პედაგოგზე ზეწოლის არაერთი ფორმა გამოიყენა.

მათი თქმით, არ არსებობს არანაირი ობიექტური მიზეზი იმის, რომ ნინო დათაშვილი პატიმრობაში დარჩეს.

"მასწავლებელი ნინო დათაშვილი სამ თვეზე მეტია უკანონო პატიმრობაშია. ნინოს დაკავება მოჰყვა 9 ივნისს საქალაქო სასამართლოში განვითარებულ მოვლენებს. მას ედავებიან საჯარო მოსამსახურეზე თავდასხმას, რაც 4-დან 7 წლამდე პატიმრობას ითვალისწინებს.

სინამდვილეში, ნინო არავის დასხმია თავს. ის სასამართლოში უკანონო პატიმრების მიმართ სოლიდარობის და მხარდაჭერის გამოსახატად იყო მისული. მას არ მისცეს სასამართლო პროცესზე დასწრების შესაძლებლობა, შემდეგ კი ყოველგვარი ახსნა-განმარტების გარეშე სასამართლოს მანდატურებმა ფიზიკური ძალის უხეში გამოყენებით, უკიდურესად დამამცირებლად და შეურაცხმყოფლად იმოქმედეს მის წინააღმდეგ — სცემეს და პირდაპირი მნიშვნელობით გაათრიეს სასამართლოს შენობიდან.

ნინომ თავდაცვის მიზნით მოიქნია ხელი, რაც იყო სრულიად ბუნებრივი და ადეკვატური მოქმედება ამ სიტუაციაში. მანდატურების მხრიდან მსგავსი ძალადობა გამოვლინდა არა მხოლოდ ნინო დათაშვილის, არამედ ბევრი სხვა მოქალაქის მიმართაც, რის შედეგადაც არაერთმა მათგანმა სხეულის მნიშვნელოვანი დაზიანებაც მიიღო.

პატიმრობის პერიოდში რეჟიმმა ნინოზე ზეწოლა სხვა ფორმითაც სცადა. პროკურატურამ პროცედურების დარღვევით და მისი თანხმობის გარეშე სასამართლოსგან მოითხოვა მისი იძულებითი ფსიქიატრიული ექსპერტიზა. ამ მოქმედების მიზანი ნინოზე ფსიქოლოგიური ზეწოლა და მისი გატეხვა იყო.

პატიმრობაში ყოფნის პერიოდში ნინოს გაურთულდა ხერხემლის პრობლემა, რომელიც მას დიდი ხანია აწუხებს. რეჟიმი არ ითვალისწინებს ამ გარემოებას და იმის მიუხედავად, რომ არ არსებობს არანაირი ობიექტური მიზეზი, ნინოს კვლავ უკანონო პატიმრობაში ტოვებს.

25 სექტემბერს, 19 საათზე ვიკრიბებით განათლების სამინისტროსთან, რათა კიდევ ერთხელ გამოვხატოთ სოლიდარობა ნინოს მიმართ.

მოგიწოდებთ ყველა მასწავლებელს და ნებისმიერ მოქალაქეს მოხვიდეთ ნინოს მხარდასაჭერად.

თავისუფლება ნინო დათაშვილს! თავისუფლება რეჟიმის ტყვეებს!," — აცხადებენ აქციის ორგანიზატორები.

ადვოკატი და კოალიცია ცვლილებისთვის წევრი მარიკა არევაძე, რომელმაც დღეს ციხეში დაპატიმრებული პედაგოგი მოინახულა, სოციალურ ქსელში წერს, რომ დათაშვილს უკვე უჭირს დამოუკიდებლად გადაადგილებაც.

ცნობისთვის, ნინო დათაშვილი "საჯარო მოსამსახურეზე განხორციელებული თავდასხმის ბრალდებით" 20 ივნისს დააკავეს. პედაგოგს სისხლის სამართლის კოდექსის 353-ე სეკუნდა მუხლის მე-3 ნაწილით ედავებიან, რაც 4-დან 7 წლამდე ვადით თავისუფლების აღკვეთას ითვალისწინებს.

ასევე იხილეთ: