"ეს არ მოხდება. პალესტინის სახელმწიფო არ შეიქმნება იორდანიის დასავლეთით", — ამის შესახებ ისრაელის პრემიერმინისტრმა ბენიამინ ნეთანიაჰუმ განაცხადა და დაგმო პალესტინის სახელმწიფოს აღიარების გადაწყვეტილება.

"მე მაქვს მკაფიო გზავნილი იმ ლიდერებისთვის, რომლებიც 7 ოქტომბრის საშინელი ხოცვა-ჟლეტის შემდეგ აღიარებენ პალესტინის სახელმწიფოს: თქვენ უზარმაზარ ჯილდოს აძლევთ ტერორიზმს.

და მე მაქვს კიდევ ერთი გზავნილი თქვენთვის: ეს არ მოხდება. პალესტინის სახელმწიფო არ შეიქმნება იორდანიის დასავლეთით" — განაცხადა მან.

პალესტინის სახელმწიფო ოფიციალურად გაერთიანებულმა სამეფომ, კანადამ და ავსტრალიამ აღიარეს.

"ჯიჰადისტური ჰამასისთვის ჯილდო" უწოდა გადაწყვეტილებას ისრაელის საგარეო უწყებამაც.

"აღიარება სხვა არაფერია, თუ არა ჯილდო ჯიჰადისტური "ჰამასისთვის", რომელსაც გაერთიანებულ სამეფოში აფილირებული მისი "მუსლიმური საძმო" აძლიერებს.

"ჰამასის" ლიდერები თავად ღიად აღიარებენ: ეს აღიარება 7 ოქტომბრის ხოცვა-ჟლეტის პირდაპირი შედეგია, "ნაყოფია".

ნუ მისცემთ ჯიჰადისტურ იდეოლოგიას თქვენი პოლიტიკის კარნახის უფლებას," — აღნიშნულია განცხადებაში.