აზერბაიჯანსა და ევროკავშირს შორის "მაღალი დონის" ეკონომიკური სამუშაო ჯგუფი შეიქმნება. ამის შესახებ გაფართოების საკითხებში ევროკომისარი მარტა კოსი აცხადებს, რომელიც დღეს აზერბაიჯანის ეკონომიკის მინისტრ მიქაილ ჯაბაროვს შეხვდა.

"აქტიური დისკუსია ეკონომიკის მინისტრ მიქაილ ჯაბაროვთან. რეგიონში მშვიდობა ბაზრების, ვაჭრობისა და ინვესტიციების შესაძლებლობებს ქმნის. მათი გამოყენების მიზნით, ჩვენ შევთანხმდით მაღალი დონის ეკონომიკური სამუშაო ჯგუფის შექმნაზე. ჩვენ გავაგრძელებთ ჩვენი პარტნიორობის განმტკიცებას," — წერს ევროკომისარი X-ზე.