პარტია ერთიანი ნაციონალური მოძრაობის ერთ-ერთი ლიდერი, ანა წითლიძე გაფართოების საკითხებში ევროკომისრის, მარტა კოსის აზერბაიჯანსა და სომხეთში ვიზიტს გამოეხმაურა. მისი თქმით, "13 წლის განმავლობაში რუსულმა რეჟიმმა მოახერხა, რომ საქართველო იყოს იზოლაციაში" და მისივე თქმით სწორედ ესაა მიზეზი იმისა, რომ ევროპელი თუ ამერიკელი მაღალი თანამდებობის პირები კავკასიაში ვიზიტისას საქართველოს აღარ სტუმრობენ.

"პირველ რიგში მინდა გამოვეხმაურო ევროკომისრის, მარტა კოსის ვიზიტს კავკასიაში. რამდენადაც ჩემთვის არის ცნობილო, მას ექნება ძალიან მნიშვნელოვანი შეხვედრები აზერბაიჯანსა და სომხეთში, მაგრამ არ ექნება საქართველოსი. ის ფაქტი, რომ უკვე მერამდენე მაღალი თანამდებობის პირია ჩვენი საერთაშორისო პარტნიორებიდან ევროპელები იქნებიან თუ ამერიკელები, ჩამოდიან კავკასიაში, აქვთ შეხვედრები აზერბაიჯანში და სომხეთში, მაგრამ საქართველოს არ იმჩნევენ საერთოდ, რაც მიუთითებს იმას, რა საგარეო პოლიტიკასაც აწარმოებს რუსული ოცნება ამ 13 წლის განმავლობაში. 13 წლის განმავლობაში რუსულმა რეჟიმმა მოახერხა, რომ საქართველო იყოს იზოლაციაში და იყოს იზოლირებული ჩვენი საერთაშორისო პარტნიორებისგან, რომლებიც არიან მთავარი გარანტი ამ ქვეყნის თავისუფლებისა", — განაცხადა ანა წითლიძემ.

ნაციონალური მოძრაობის ერთ-ერთი ლიდერი ჩეხეთის მიერ ქართული დიპლომატიური პასპორტებისთვის სავიზო რეჟიმის შემოღებასაც გამოეხმაურა და აღნიშნა, რომ "დღეს საქართველოს მართავს ე.წ ხელისუფლება, რომელსაც არ აღიარებს ცივილიზებული სამყარო."

"ასევე, ის ფაქტი, რომ ჩეხეთმა დიპლომატიური პასპორტები გააუქმა საქართველოში, ესეც ნათელი დადასტურებაა რეალურად ამ საერთაშორისო იზოლაციის, რომელშიც რეჟიმი არის. დღეს საქართველოს მართავს ე.წ ხელისუფლება, რომელსაც არ აღიარებს ცივილიზებული სამყარო.

ეს პროცესები საერთაშორისო პარტნიორებისგან კიდევ უფრო გამკაცრდება რეჟიმზე, ჩვენ ველით, რომ სანქციების პაკეტები გავრცელდება ოჯახის წევრებზე და იმ ადამიანებზე, რომლებიც ხელს უწყობს რეჟიმს, იქნება კიდევ უფრო ფართო", — განაცხადა ანა წითლიძემ

ცნობისთვის, 17 სექტემბერს, გაფართოების საკითხებში ევროკომისარი, მარტა კოსი სამდღიანი ვიზიტით აზერბაიჯანში და სომხეთში გაემგზავრა — საქართველო აღნიშნული ვიზიტის ფარგლებში ნახსენები არ არის. ოფიციალური შეხვედრები დღეს დაიწყო.