17 სექტემბერს, გაფართოების საკითხებში ევროკომისარი, მარტა კოსი სამდღიანი ვიზიტით აზერბაიჯანში და სომხეთში გაემგზავრა — საქართველო აღნიშნული ვიზიტის ფარგლებში ნახსენები არ არის. ინფორმაციას ევროკომისია ავრცელებს.

განცხადებაში აღნიშნულია, რომ სომხეთ-აზერბაიჯანის სამშვიდობო პროცესით ახლა რეგიომში ევროკავშირის თანამშრომლობის გაძლიერება შესაძლებელია. მარტა კოსი ვიზიტის ფარგლებში აზერბაიჯანის პრეზიდენტ, ილჰამ ალიევს, აზერბაიჯანის საგარეო საქმეთა მინისტრ ჯეიჰუნ ბაირამოვს და ეკონომიკის მინისტრ მიქაილ ჯაბაროვს შეხვდება.

"გაფართოების საკითხებში კომისარი, მარტა კოსი სამდღიანი ვიზიტით მიემგზავრება აზერბაიჯანში და სომხეთში — გადამწყვეტ მომენტში ევროკავშირის ურთიერთობებისთვის სამხრეთ კავკასიის რეგიონში. სომხეთ-აზერბაიჯანის სამშვიდობო პროცესით, ახლა არსებობს შესაძლებლობა, გაძლიერდეს ევროკავშირის თანამშრომლობა რეგიონში და წინ წაიწიოს ევროკავშირის კავშირების დღის წესრიგმა, რაც შავი ზღვის სტრატეგიის ქვაკუთხედი და რეგიონული განვითარების ხელშეწყობაში შეტანილი კონკრეტული წვლილია.

ბაქოსა და ერევანში კომისარი კიდევ ერთხელ დააფიქსირებს ევროკავშირის მტკიცე ერთგულებას სამხრეთ კავკასიაში მშვიდობის, სტაბილურობისა და მდგრადი ზრდის მიმართ.

ხვალ აზერბაიჯანში კომისარი კოსი მაღალი დონის შეხვედრებს გამართავს პრეზიდენტ ილჰამ ალიევთან, საგარეო საქმეთა მინისტრ ჯეიჰუნ ბაირამოვთან და ეკონომიკის მინისტრ მიქაილ ჯაბაროვთან", — წერია გავრცელებულ განცხადებაში.

ევროკომისარი გაფართოების საკითხებში მაღალი დონის შეხვედრებს სომხეთშიც გამართავს. ის პრეზიდენტს, პრემიერმინისტრს, ვიცეპრემიერს და შინაგან საქმეთა მინისტრს შეხვდება

"სომხეთში, პარასკევს და შაბათს, კომისარი შეხვდება პრეზიდენტ ვაჰაგნ ხაჩატურიანს, პრემიერმინისტრ ნიკოლ ფაშინიანს და ვიცეპრემიერ მჰერ გრიგორიანს, ასევე შინაგან საქმეთა მინისტრ არპინე სარგსიანს. კომისარი კოსი მონაწილეობას მიიღებს ევროპის რეკონსტრუქციისა და განვითარების ბანკთან დაკავშირებული ორი პროექტის ხელმოწერაში, ეწვევა EU4Sevan-ის ბიომრავალფეროვნების პროექტის ობიექტს და დაათვალიერებს TUMO-ს შემოქმედებითი ტექნოლოგიების ცენტრს.

ერევანში, კომისარი ასევე შეხვდება სამოქალაქო საზოგადოების ორგანიზაციებს, ქალ ლიდერებს და ახალგაზრდა ევროპელ ელჩებს", — წერია ევროკომისიის მიერ გავრცელებულ განცხადებაში.