"გეტყვით, პარლამენტის პრეროგატივა არ გახლავთ არავის დაკავება და სისხლის სამართლებრივი დევნა", — ასე უპასუხა ოცნების პარლამენტის თავმჯდომარემ შალვა პაპუაშვილმა ჟურნალისტის კითხვას შესაძლოა თუ არა გაგრძელდეს მაღალჩინოსნების დაკავებები.

"ვერ გეტყვით, პარლამენტის პრეროგატივა არ გახლავთ არავის დაკავება და სისხლის სამართლებრივი დევნა. მთავარი არის გაცხადებული პოლიტიკა, რომელიც აქვს ირაკლი კობახიძეს მისი პრემიერმინისტრად არჩევის დღიდან და გაცხადებული პოლიტიკა არის, როგორც ნარკორეალიზაციის წინააღმდეგ ბრძოლა ისე, კორუფციასთან ბრძოლა, შესაბამისად, ამ საკითხს რაც დასჭირდება, ისე მიჰყვებიან სამართალდამცველი ორგანოები", — თქვა პაპუაშვილმა.

კითხვაზე — ირაკლი ღარიბაშვილი შესაძლოა თუ არა იყოს გამოძიების სამიზნე, შალვა პაპუაშვილმა გაიმეორა, რომ პარლამენტის პრეროგატივას არ წარმოადგენს სისხლის სამართლებრივი დევნა.

"კიდევ ერთხელ, პარლამენტის პრეროგატივას არ წარმოადგენს სისხლის სამართლებრივი დევნა. მაშინ, გიპასუხებთ ისე, როგორც ტრამპი პასუხობს ხოლმე ასეთ სპეკულაციურ კითხვებს, რომ შესაძლებელია თუ არა, რომ ბომბი დაგეცეს თავზე. ასეთი დონის კითხვაა. ტრამპი, პასუხობს ხოლმე ზუსტად ასე, თქვენი კოლეგა, ნიუსებს რომ ეძახის ხოლმე, "ფეიკ მედიის" კითხვებს, რომ შეიძლება თუ არა, ბომბი დაგეცეს თავზე?", — განაცხადა შალვა პაპუაშვილმა.