ევროკავშირი რუსეთის მიერ უკრაინის უკანონოდ ანექსირებულ ტერიტორიებზე ადგილობრივი არჩევნების ჩატარებას გმობს და მის შედეგებს არ აღიარებს. ამის შესახებ ინფორმაცია ევროკავშირის დიპლომატიურმა სამსახურმა 13 სექტემბერს გაავრცელა.

პრესსპიკერის თქმით, ოკუპირებულ ტერიტორიებზე არჩევნების ჩატარება საერთაშორისო სამართლის კიდევ ერთი დარღვევა და უკრაინის სუვერენიტეტის ხელყოფაა. მისივე თქმით, ევროკავშირი იმეორებს თავის პოზიციას და აღნიშნავს, რომ ყირიმი უკრაინაა.

"ევროკავშირი არ აღიარებს არც ეგრეთ წოდებულ "არჩევნებს" და არც მის შედეგებს ოკუპირებულ ტერიტორიაზე. ეს არის საერთაშორისო სამართლის კიდევ ერთი დარღვევა, მათ შორის გაეროს წესდების და უკრაინის სუვერენიტეტის, დამოუკიდებლობისა და ტერიტორიული მთლიანობის.

უკრაინაში რუსეთის შეჭრიდან და ყირიმის უკანონო ანექსიის მცდელობიდან ათწლეულზე მეტი გავიდა. ევროკავშირი კვლავ იმეორებს თავის პოზიციას: ყირიმი არის უკრაინა. 2014 წლის 27 მარტის გაეროს გენერალური ასამბლეის რეზოლუციაზე დაყრდნობით, ჩვენ მოვუწოდებთ რუსეთს, შეწყვიტოს უკრაინის ეროვნული ერთიანობისა და ტერიტორიული მთლიანობის ხელყოფის მცდელობები.

ევროკავშირი გამოხატავს ურყევ მხარდაჭერას უკრაინისადმი რუსეთის აგრესიის წინააღმდეგ ბრძოლაში და კვლავ რჩება მტკიცე მხარდამჭერი უკრაინაში ყოვლისმომცველი, სამართლიანი და მდგრადი მშვიდობის დამკვიდრებისთვის", — წერია ევროკავშირის დიპლომატიური სამსახურის განცხადებაში.

ცნობისათვის, რუსეთის ხელისუფლებამ რეგიონული და ადგილობრივი არჩევნები, მათ შორის უკანონოდ ანექსირებულ ყირიმში, კერძოდ სევასტოპოლში 14 სექტემბერს ჩაატარა.