ბრაზილიის ყოფილ პრეზიდენტს, ჟაირ ბოლსონაროს 27 წლითა და 3 თვით თავისუფლების აღკვეთა მას შემდეგ მიუსაჯეს, რაც უზენაესი სასამართლოს კოლეგიამ იგი სამხედრო გადატრიალების მოწყობის მცდელობაში დამნაშავედ ცნო. ამის შესახებ ინფორმაციას BBC ავრცელებს.

ხუთი მოსამართლიდან ოთხმა ბოლსონარო დამნაშავედ ცნო, ერთმა კი მის გამართლებას მისცა ხმა. მოსამართლეებმა დაადგინეს, რომ ის შეთქმულებას ხელმძღვანელობდა, რომელიც მიზნად, 2022 წლის არჩევნებში მარცხის შემდეგ, ბოლსონაროს ხელისუფლებაში დარჩენას ისახავდა.

უზენაესი სასამართლოს გადაწყვეტილებით, ბოლსონაროს 2060 წლამდე საჯარო თანამდებობებზე კენჭისყრის უფლება აღარ ექნება.

ბოლსონარუოს, რომელსაც ბრაზილიის სასამართლომ მიმალვის რისკის გამო შინაპატიმრობა მიუსაჯა, პროცესის საბოლოო ეტაპს პირადად არ დასწრებია. მან აქამდე არაერთხელ თქვა, რომ სასამართლო პროცესი მიზნად ისახავდა მისთვის 2026 წლის საპრეზიდენტო არჩევნებში მონაწილეობის შეზღუდვას — მიუხედავად იმისა, რომ მანამდე უკვე ჩამოშორებული იყო საჯარო თანამდებობებზე კენჭისყრას სხვა საქმეების გამო.

აშშ-ის პრეზიდენტმა, დონალდ ტრამპმაც, რომელმაც ბრაზილიის საქონელზე 50%-იანი ტარიფები დააწესა, ბოლსონაროს წინააღმდეგ მიმდინარე სამართლებრივი დევნის საპასუხოდ განცხადება გააკეთა. განაჩენის გამოცხადების შემდეგ ტრამპმა თქვა, რომ ეს "ძალიან მოულოდნელი" იყო და საკუთარ გამოცდილებას შეადარა: "ზუსტად ისევე, როგორც ჩემს წინააღმდეგ სცადეს. მაგრამ მათ ეს არ გამოუვიდათ."

ბოლსონარო, რომელიც ახლა 70 წლისაა, პრაქტიკულად დარჩენილ სიცოცხლეს ციხეში გაატარებს.

BBC-ის ცნობით, ბოლსონაროს ადვოკატები გეგმავენ სასჯელის შემცირება და მისი შინაპატიმრობაში დატოვება მოითხოვონ. მათ ასევე განაცხადეს, რომ განაჩენს გაასაჩივრებენ, თუმცა იურისტების თქმით, ეს რთული იქნება, რადგან სააპელაციო განხილვა, წესის მიხედვით, მხოლოდ მაშინ ხერხდება, თუ ხუთიდან ორი მოსამართლე მაინც გამამართლებელ განაჩენს უჭერს მხარს.