თბილისის საქალაქო სასამართლოში პატიმრობაში მყოფი მასწავლებლის, ნინო დათაშვილის საქმეზე ჩანიშნული სხდომა გადაიდო. მიზეზი პედაგოგის ჯანმრთელობის მდგომარეობაა.

სხდომის გადადების შუამდგომლობა მისმა ადვოკატმა, თამარ გაბოძემ დააყენა, რადგან ნინო დათაშვილი საკუთარ პროცესზე ვერ მივიდა. მოსამართლემ მომდევნო სხდომა 17 სექტემბერს, 15:00 საათზე ჩანიშნა.

ადვოკატის განცხადებით, ნინო დათაშვილს ნერვის ანთება აქვს.

"ძალიან ჰქონდა გართულებული ჯანმრთელობის მდგომარეობა. აქვს ნერვის ანთება, უწევს გამაყუჩებლების მიღება ტკივილის სამართავად, მაგრამ როგორც ჩანს, ამის მიუხედავად ვერ შეძლო მოსვლა. ვაყენებთ შუამდგომლობას სხდომის გადადებაზე," — განაცხადა ადვოკატმა, თამარ გაბოძემ.

ცნობისთვის, ნინო დათაშვილი "საჯარო მოსამსახურეზე განხორციელებული თავდასხმის ბრალდებით" 20 ივნისს დააკავეს. მანდატურზე თავდასხმის ფაქტზე ბრალდებულ ნინო დათაშვილს აღკვეთის ღონისძიების სახით პატიმრობა 21 ივლისს შეეფარდა. პედაგოგს სისხლის სამართლის კოდექსის 353-ე სეკუნდა მუხლის მე-3 ნაწილით ედავებიან, რაც 4-დან 7 წლამდე ვადით თავისუფლების აღკვეთას ითვალისწინებს.