"ეს არის ქართული ოცნების მცდელობა, ნებისმიერ ფასად შეათრიოს ოპოზიცია არალეგიტიმურ არჩევნებში და მოიპოვოს ლეგიტიმაცია" — ასე ეხმაურება კოალიცია ცვლილებისთვის ერთ-ერთი ლიდერი ელენე ხოშტარია ოცნების დანიშნული პრეზიდენტის, მიხეილ ყაველაშვილის მიერ კოალიცია ლელო — ძლიერი საქართველოს ლიდერების, მამუკა ხაზარაძისა და ბადრი ჯაფარიძის შეწყალებას.

ელენე ხოშტარია ლელო — ძლიერ საქართველოს და პირადად ხაზარაძე-ჯაფარიძეს მოუწოდებს, გამოვიდნენ "რუსული სპეცოპერაციიდან" და საერთო ბრძოლას დაუბრუნდნენ.

როგორც ხოშტარიას აღნიშნავს, "არ აქვს მნიშვნელობა რა ჩაიფიქრა რეჟიმმა, ყველაზე მნიშვნელოვანია როგორ პასუხობს ამას ოპოზიცია".

"კოალიცია ცვლილებისთვის სახელით, გვინდა გამოვეხმაუროთ, ე.წ. ვითომ პრეზიდენტის გადაწყვეტილებას მამუკა ხაზარაძისა და ბადრი ჯაფარიძის შეწყალებასთან დაკავშირებით, პირველ რიგში, ბუნებრივია ადამიანის თავისუფლება არის სასიხარულო და ვულოცავ მათ ამას ადამიანურად და ვუსურვებ ღირსეულ თავისუფლებას ყველა სინდისის პატიმარს და ყველა პოლიტპატიმარს, რომელიც რჩება ციხეში. ამასთანავე, ყველას ძალიან კარგად გვესმის რას ნიშნავს ეს პოლიტიკურად, რას ემსახურება ეს გადაწყვეტილება პოლიტიკურად. ეს არის ქართული ოცნების მცდელობა, ნებისმიერ ფასად შეათრიოს ოპოზიცია არალეგიტიმურ არჩევნებში და მოიპოვოს ლეგიტიმაცია. ლეგიტიმაცია, რომელიც არის ერთადერთი, რაც ასაზრდოებს ამ რეჟიმს, ამას შვრებიან ყველაფრის ფასად. ამასთანავე, არ აქვს მნიშვნელობა რა ჩაიფიქრა რეჟიმმა, ყველაზე მნიშვნელოვანია როგორ პასუხობს ამას ოპოზიცია, ნამდვილი ოპოზიცია.

მე მინდა მთელი გულით და პატივისცემით მივმართო მამუკას და ბადრის, მივმართო დღეს, ზუსტად გათავისუფლების დღეს — მიიღეთ ერთადერთი სწორი გადაწყვეტილება ქვეყნისთვის, არა კოალიციისთვის, არა ჩემთვის, ქვეყნისთვის ერთადერთი სწორი გადაწყვეტილება, გამოდით არასწორი, არარსებული, რუსული სპეცოპერაციიდან, გამოდით და დაუბრუნდით, საერთო, პრინციპულ, არათანამშრომლობის, არ შეგუების, არ დამორჩილების, წინააღმდეგობის ბრძოლას. ეს იქნება გაძლიერება ამ ბრძოლის. ეს იქნება ერთადერთი სწორი გადაწყვეტილება ლელოსთვის მთლიანად ოპოზიციისთვის, ყველა აქტივისტისთვის და რაც მთავარია ჩვენი ქვეყნისთვის. მოუთმენლად ველი ამ სწორ გადაწყვეტილებას ლელოსგან.

ფაქტია ქართულმა ოცნებამ გადაწყვიტა და ეს თქვა კიდევაც, ვინც მონაწილეობს ე.წ. არჩევნებში ის დააჯილდოვოს თავისუფლებით. ეს გაანადგურებს ლელოს თუ ღირსეულ გზაზე დააბრუნებს, არის მხოლოდ ლელოზე დამოკიდებული.

ქართულ ოცნებას შეუძლია ჩაიფიქროს რაღაც საშინელება, მაგრამ ჩვენ არ ვართ ნივთები ქართული ოცნების ხელში, ჩვენ ვართ დამოუკიდებელი ადამიანები, ოპოზიციონერები, რომლებმაც უნდა მივიღოთ გადაწყვეტილება. ამიტომ, მხოლოდ ლელოს ხელშია ის განადგურდება, სისტემური ოპოზიცია იქნება თუ გააგრძელებს ბრძოლას და ამ მახეში, თუნდაც ქართული ოცნების დაგეგმილ მახეში, ჩაებმება თუ არა," — განაცხადა ელენე ხოშტარიამ.

ოცნების დანიშნულმა პრეზიდენტმა მიხეილ ყაველაშვილმა დღეს დილით სოციალურ ქსელში დაწერა, რომ ლელო — ძლიერი საქართველოს ლიდერები მამუკა ხაზარაძე და ბადრი ჯაფარიძე შეიწყალა. მისი თქმით, ეს გადაწყვეტილება იმიტომ მიიღო, რომ "არავის დარჩეს იმის თქმის საბაბიც კი, რომ ადგილობრივი თვითმმართველობის არჩევნები შეზღუდული კონკურენტუნარიანობის პირობებში ტარდება".

ყაველაშვილი აღნიშნავს, რომ "შეთავაზებას შეწყალების შესახებ შესაბამისმა პატიმრებმა რამდენიმე კვირის წინ უარით უპასუხეს".