მედიაში გავრცელებული ინფორმაცია, შვეიცარიაში მაკდონალდსის რესტორნების დახურვის შესახებ, სიმართლეს არ შეესაბამება. შვეიცარიაში ამჟამად ამ ბრენდის 160-ზე მეტი რესტორანი არსებობს და ოფიციალური საიტის მიხედვით, ყველა მათგანი შეუფერხებლად ოპერირებს.

შვეიცარიის მაკდონალდსის რესტორნების რუკა

შვეიცარიის მაკდონალდსის რესტორნების რუკა

ფოტო: mcdonalds.ch

სიახლე უკანასკნელი რამდენიმე საათის მანძილზე სხვადასხვა ქართულ და რუსულ გამოცემებში გავრცელდა, პირველწყაროდ კი, რუსულენოვანი გამოცემა Percare.ru იძებნება.

გუშინ გავრცელებული ინფორმაცია, სავარაუდოდ, ოთხი წლის წინანდელი შემთხვევის განმეორებაა. 2012 წლის 21 მარტს რუსულმა გამოცემამ Pravda.ru, საკუთარ საიტზე, რუსულ და ინგლისურ ენებზე გამოაქვეყნა სტატია, სწრაფი კვების რესტორნების წინააღმდეგ ევროპის სახელმწიფოთა ბრძოლის შესახებ. მასალაში ნახსენები იყო, რომ შვეიცარია დარღვევების გამო მაკდონალდსის ყველა რესტორანს ხურავდა.

ეს ინფორმაცია სიცრუე აღმოჩნდა. საიტმა შეცდომა ორ დღეში გაასწორა და ინგლისურენოვან სტატიას ახსნა-განმარტებაც დაურთო. ინფორმაცია ამის შესახებ ერთ-ერთ ავსტრალიურ ფორუმზე იძებნება, მაგრამ ტექსტი გასწორებული შეცდომის შესახებ, სტატიიდან ამჟამად ამოღებულია. შეცდომის გასწორებამდე, დეზინფორმაციის სიმართლედ გავრცელება ბევრმა ინგლისურ და რუსულენოვანმა საიტმა მოასწრო. რამდენიმე მათგანი კი დღემდე გამოქვეყნებულია.