ახალ ინტერვიუში მსახიობმა გალ გადოტმა, რომელმაც ფიფქიას ლაივ-ექშენში ბოროტი დედინაცვლის როლი შეასრულა, ფილმის წარუმატებლობა იმას დააბრალა, რომ "ხალხი სელებრითებს ისრაელის საწინააღმდეგო განცხადებების გაკეთებას აძალებს".

გადოტი ისრაელის სელებრითების სატელევიზიო პროგრამაში იყო სტუმრად, სადაც ჟურნალისტმა ჰკითხა, გაბრაზდა თუ არა ფიფქიას ადაპტაციის წარუმატებლობის გამო. მსახიობის პასუხი ასეთი იყო: "პირველ რიგში, ძალიან ვისიამოვნე ამ ფილმის გადაღებით. რეიჩელთან მუშაობა ძალიან კარგი იყო — ვიცინოდით, ვსაუბრობდით და ვერთობოდით. დარწმუნებული ვიყავი, რომ ფილმი ბევრ წარმატებას მიაღწევდა".

გადოტმა ისრაელის თავდაცვის ძალებში საბრძოლო მომზადების ინსტრუქტორის პოზიციაზე 2 წლის განმავლობაში იმსახურა. ამავდროულად კი მისი თანამსახიობი რეიჩელ ზეგლერი საჯაროდ გამოხატავს პალესტინისა და ღაზას მიმართ მხარდაჭერას. როგორც ცნობილია, ფილმის პიარ-კამპანიისას რეჟისორი მარკ პლატი რეიჩელის განცხადებებით არც ისე კმაყოფილი იყო.

გადოტი ამბობს: "და შემდეგ 7 ოქტომბერი მოხდა და როგორც ყველა ინდუსტრიაში, ისე ჰოლივუდშიც, ხალხი აძალებს ცნობილ ადამიანებს, რომ ისრაელის საწინააღმდეგო განცხადება გააკეთონ. გული დამწყდა, რომ ამან ფილმის წარმატებაზე ძალიან იმოქმედა".

ისრაელისა და პალესტინის კონფლიქტმა მართლაც იმოქმედა გადოტის სამსახიობო კარიერაზე: მაისში მისი ახალი ფილმის გადასაღებ მოედანთან გამართული აქციის გამო 5 დემონსტრანტი დააკავეს, 2 თვის შემდეგ კი ჰოლივუდის დიდების ხეივანში მსახიობის ვარსკვლავის გახსნის ცერემონია პალესტინისა და ისრაელის მხარდასაჭერი აქციების გამო გადაიდო. გალ გადოტი პირველი მსახიობია ისრაელიდან, რომელსაც ვარსკვლავი გაუხსნეს.

ფოტო: Jordan Strauss / Invision

ხოლო რაც შეეხება ფიფქიას, დისნეიმ ამ ფილმის შედეგად დაახლოებით 115 მილიონი დოლარი დაკარგა.