ოცნების ლიდერ მამუკა მდინარაძეს დღეს გამართულ ბრიფინგზე კითხვა დაუსვეს რუსული FSB-ს ბრალდებაზე იმის შესახებ, რომ უკრაინის სპეცსამსახურები ყირიმის ხიდზე ტერაქტს გეგმავდნენ, 130 კილოგრამი ასაფეთქებელი ნივთიერება კი რუსეთში საქართველოს გავლის ავტომობილით შევიდა.

მდინარაძემ განაცხადა, რომ "შეიძლება მართლაც რაღაცა გაიპარა საქართველოდან ან არ გაიპარა, ამას დადგენა სჭირდება".

"არაფერს გამოვრიცხავ. ყველა ქვეყნის სპეცსამსახურს, მათ შორის, რუსეთის - ჩვენი ქვეყნის 20%-მდე ტერიტორიის ოკუპირების ავტორი ქვეყნის სპეცსამსახურებს თავისი ინტერესები აქვთ და მის გაშიფვრას მე ვერ დავიწყებ. შეიძლება, ასეც იყოს ან არ იყოს. ყოველ შემთხვევაში, ამ ვერსიის გამორიცხვა არ შეიძლება. თუმცა, შემიძლია ვთქვა, რომ მსგავსი და ანალოგიური შემთხვევა ადრეც იყო. რამდენად დადასტურდება ან არ დადასტურდება, მეორე საკითხია. ყველა ქვეყანას, ოკუპანტს თუ არაოკუპანტს, მეგობარს თუ მეგობრად წოდებულს აქვს თავისი ინტერესები და ყველა ქვეყნის მსგავსი და მისი სპეცსამსახურის განცხადება უნდა განვიხილოთ მისი ინტერესებიდან გამომდინარე და იმ სიცრუეში არ უნდა შევიდეთ, შარშან რომ ამბობდით, რომ აი, „მეგობარი გეუბნებათ ამას". მეგობრობა არსებობს ადამიანებში და იქაც, სამწუხაროდ, ინტერესები მეგობრობის ხარისხზე გავლენას ახდენს ხოლმე.

რაც შეეხება ნებისმიერ განცხადებას — ასეთ შემთხვევაში უნდა ვივარაუდოთ და ვირწმუნოთ, რომ ყველა ქვეყანა საკუთარი ინტერესებიდან გამომდინარე საუბრობს და მოქმედებს და შენზე, შენს ქვეყანაზე არავინ ფიქრობს. ჩვენ ჩვენს თავს უნდა მივხედოთ. ამას უნდა მივხვდეთ".

...შეიძლება მართლაც რაღაცა გაიპარა საქართველოდან ან არ გაიპარა, არავინ იცის ეს — ამას დადგენა სჭირდება. სამართალდამცავებიც ამასთან დაკავშირებით ჯერ მოახდენენ რეაგირებას და შემდეგ განცხადებას გააკეთებენ", — მამუკა მდინარაძე რუსული FSB-ს ბრალდებაზე.

შეგახსენებთ, რომ რუსეთის უშიშროების ფედერალურმა სამსახურმა (FSB) განაცხადა, რომ უკრაინის სპეცსამსახურები ყირიმის ხიდზე ტერაქტს გეგმავდნენ, 130 კილოგრამი ასაფეთქებელი ნივთიერება კი რუსეთში საქართველოს გავლის ავტომობილით შევიდა.