ბოლო 6 კვირის განმავლობაში ღაზაში ჰუმანიტარული დახმარების დროს 790-ზე მეტი ადამიანი დაიღუპა, ინფორმაციას გაეროს ადამიანის უფლებათა ოფისი ავრცელებს.

"(27 მაისიდან) 7 ივლისამდე ჩვენ დავაფიქსირეთ 798 მკვლელობა, მათ შორის 615 ღაზას ჰუმანიტარული ფონდის მიმდებარე ტერიტორიაზე და 183, სავარაუდოდ, ჰუმანიტარული კოლონის მარშრუტზე," — განაცხადა გაეროს უფლებათა ოფისის (OHCHR) პრესსპიკერმა რავინა შამდასანიმ ჟენევაში გამართულ რეგულარულ ბრიფინგზე.

გაერო ჰუმანიტარული დახმარების ამ პროცესს სახიფათოდ მიიჩნევს. მათი განცხადებით, გარდაცვალების მიზეზი ცეცხლსასროლი იარაღით მიყენებული ჭრილობებია.

Reuters-ის მიხედვით, მათი უმეტესობა აშშ-სა და ისრაელის მიერ მხარდაჭერილი დახმარების პუნქტების ტერიტორიაზე დაიღუპა.

ფონდმა GHF-მა მაისის ბოლოს დაიწყო ღაზაში საკვების დარიგება და არაერთხელ უარყო ცნობები, რომ მის ობიექტებზე თავდასხმის ინციდენტები მოხდა.