პრემიერმინისტრმა მარკ კარნიმ განაცხადა, რომ კანადა პალესტინის სახელმწიფოს აღიარებას სექტემბერში გეგმავს, რაც მას G7-ის რიგით მესამე სახელმწიფოდ აქცევს, რომელმაც ბოლო დღეებში მსგავსი განცხადება გააკეთა. ამის შესახებ ინფორმაციას BBC ავრცელებს.

კარნის თქმით, ეს ნაბიჯი დამოკიდებული იქნება დემოკრატიულ რეფორმებზე, მათ შორის იმაზე, რომ პალესტინის ხელისუფლებამ მომავალ წელს არჩევნები ჰამასის გარეშე ჩაატაროს.

მისი კომენტარი დიდი ბრიტანეთის პრემიერმინისტრის, კირ სტარმერის განცხადებას მოჰყვა, რომელმაც გუშინ თქვა, რომ სექტემბერში პალესტინის სახელმწიფოს აღიარებს, თუ ისრაელი ცეცხლის შეწყვეტასა და სხვა პირობებზე არ დათანხმდება. ერთი კვირით ადრე მსგავსი გეგმის შესახებ ისაუბრა საფრანგეთის პრეზიდენტმა ემანუელ მაკრონმაც.

ისრაელის საგარეო საქმეთა სამინისტრომ კანადის განცხადება დაგმო და მას "ჰამასისთვის ჯილდო" უწოდა.

კარნიმ აღნიშნა, რომ კანადა პალესტინის სახელმწიფოს ოფიციალურად გაერთიანებული ერების ორგანიზაციის გენერალურ ასამბლეაზე აღიარებს. მან მიზეზებად ოკუპირებულ დასავლეთ სანაპიროზე ისრაელის დასახლებების გაფართოება, ღაზაში ჰუმანიტარული მდგომარეობის გაუარესება და ჰამასის მიერ 2023 წლის 7 ოქტომბრის ისრაელზე თავდასხმები დაასახელა.

"ადამიანური ტანჯვის დონე ღაზაში აუტანელია და სიტუაცია სწრაფად მძიმდება," — განუცხადა კარნიმ ჟურნალისტებს.

მან აღნიშნა, რომ პალესტინის სახელმწიფოს აღიარება პალესტინის ხელისუფლების მხრიდან მმართველობის ფუნდამენტური რეფორმებისა და ტერიტორიის დემილიტარიზაციის ვალდებულებებს დაეფუძნება.