ბათუმში ჯგუფურად ჩადენილი ძალადობის ბრალდებით ხუთი ადამიანი დააკავეს. გამოძიება სისხლის სამართლის კოდექსის 126-ე მუხლის პირველი პრიმა ნაწილით მიმდინარეობს. შსს-ის განცხადებით, 3 დეკემბერს ბათუმში გამართული საპროტესტო აქციის ფარგლებში, აქციის მონაწილეთა ჯგუფი ბათუმის ხელოვნების სასწავლო უნივერსიტეტში შევიდა რექტორის სამუშაო ოთახთან ბანერის გაკვრის მიზნით, რის საშუალებაც მათ არ მისცა ამავე უნივერსიტეტის ლექტორმა თ.ც.-მ. ამის გამო უნივერსიტეტის დეკანმა მ.ჯ.-მ მას სიტყვიერი შეურაცხყოფა მიაყენა.

რადიო თავისუფლების ცნობით, კონფლიქტი 3 დეკემბერს საპროტესტო ბანერების უნივერსიტეტის შენობაში გაკვრას მოჰყვა — უნივერსიტეტის ერთ-ერთი ასოცირებული პროფესორი ლექციების ჩაშლას ეწინააღმდეგებოდა, რა დროსაც მას დეკანი სიტყვიერად დაუპირისპირდა.

შელაპარაკების შემდეგ კი პროფესორის ქმარი და მეგობარი უნივერსიტეტში მივიდნენ. რადიო თავისუფლების ცნობით, ისინი ბათუმის მერიის თანამშრომლები არიან. უნივერსიტეტის ტერიტორიაზე მოხდა დაპირისპირება, რა დროსაც ორივე მამაკაცს ფიზიკურად გაუსწორდნენ, დეკანთან ერთად ჩხუბში ჩაერთნენ სტუდენტები. სათვალთვალო კამერებიდან ამოიღეს კონფლიქტის ამსახველი ვიდეოჩანაწერი, რის საფუძველზეც მოხდა დაკავება.

დაკავებული დეკანი მამუკა ჯორბენაძეა, რომელიც ბათუმში მიმდინარე საპროტესტო აქციებში აქტიურად მონაწილეობდა. მისი ადვოკატი ამბობს, რომ მისი დაცვის ქვეშ მყოფი თავს იცავდა და სტუდენტები აშველებდნენ.