ესტონეთმა ქართულ ოცნებასთან დაკავშირებული 19 პირი დაასანქცირა. მათ შორის არიან ოცნების პარლამენტის დეპუტატები, თეა წულუკიანის კომისიის წევრები, სინდისის პატიმრების მოსამართლეები და პროკურორები. ესტონეთმა ასევე ქართული ოცნების გენერალური პროკურორი და იუსტიციის მინისტრი — გიორგი გვარაკიძე და პაატა სალია დაასანქცირა.

სინდისის პატიმრების საქმეების მონაწილე პირები:

  • ნინო გალუსტაშვილი — მოსამართლე, რომელმაც მათე დევიძეს და გიორგი მინდაძეს 4-5 წლამდე თავისუფლების აღკვეთა მიუსაჯა. ის ასევე პროევროპულ აქციებში მონაწილეობისთვის ჯგუფური ძალადობის ბრალდებით დაკავებული 11 პირის საქმის მოსამართლეა.
  • ჯვებე ნაჭყებია — მოსამართლე, რომელმაც ანრი კვარაცხელიას, ზურაბ გირჩი ჯაფარიძეს და ნიკა გვარამიას განაჩენი გამოუტანა.
  • ანი ხუბეჯაშვილი — გიორგი ოკმელაშვილის და მათე დევიძის საქმის პროკურორი;
  • მარი მეშველიანი და ნათია თათიაშვილი — პროკურორები, რომლებიც თეა წულუკიანის კომისიაზე გამოუცხადებლობის საქმეში იყვნენ ჩართულები.
  • ვიქტორ მეტრეველი და ნინო სახელაშვილი — მზია ამაღლობელის ადმინისტრაციული და სისხლის სამართლის საქმის მოსამართლეები;
  • ირაკლი შვანგირაძე — ჯგუფური ძალადობის ბრალდებით დაკავებული 11 პირის და ნიკა მელიას საქმის მოსამართლე;

ქართული ოცნების წარმომადგენლები:

  • ქართული ოცნების პარლამენტის დროებითი საგამოძიებო კომისიის წევრები: ალუდა ღუდუშაური, გურამ მაჭარაშვილი, სოზარ სუბარი, თენგიზ შარმანაშვილი, ილია ინჯია და ალექსანდრე ტაბატაძე.

ესტონეთის მიერ ასევე დასანქცირდა ქართული ოცნების დეპუტატი მარიამ ლაშხი, რომლის საჩივრის საფუძველზეც 19-20 წლის აქტივისტ ქალებს თავისუფლების აღკვეთა მიესაჯათ. რაც შეეხება დროებითი საგამოძიებო კომისიის თავმჯდომარე, თეა წულუკიანი ესტონეთმა 2023 წელს დაასანქცირა.

"ესტონეთი კვლავაც მხარს დაუჭერს საქართველოს სამოქალაქო საზოგადოებას, დამოუკიდებელ მედიას და საქართველოს მოსახლეობას ღირსების, უფლებებისა და ევროპული მომავლისთვის ბრძოლაში," — განაცხადა ესტონეთის საგარეო საქმეთა მინისტრმა, მარგუს ცაჰკნამ.