საპარლამენტო უმრავლესობა მიიჩნევს, რომ საქართველოს კონსტიტუციის პროექტს ერთპარტიულად არ იღებენ. ამ შინაარსის განცხადება დღეს პარლამენტის ვებგვერდზე გავრცელდა.

"საქართველოს პარლამენტის უმრავლესობაში, გარდა ქართული ოცნებისა, ფრაქციების სახით წარმოდგენილია ოთხი პოლიტიკური სუბიექტი, რომლებსაც ცნობადობაც, ისტორიაც, რეიტინგიც, რეპუტაციაც და პარტიის წევრთა რაოდენობაც კი გაცილებით დიდი აქვთ, ვიდრე პრეზიდენტის მიერ კონსტიტუციური პროცესის დასაზიანებლად შემოკრებილი პარტიების უდიდეს უმრავლესობას", - აღნიშნულია განცხადებაში.

საპარლამენტო უმრავლესობა ოპონენტებს მოუწოდებს, თავი შეიკავონ ისეთი განცხადებებისგან, რომლებშიც მიზანმიმართულად შეურაცხყოფენ ოთხ საპარლამენტო პარტიას - სოციალ-დემოკრატები - საქართველოს განვითარებისთვის, საქართველოს კონსერვატიული პარტიას, საქართველოს მწვანეთა პარტიასა და მრეწველობა გადაარჩენს საქართველოს.

"საპარლამენტო უმრავლესობაში ფრაქციების სახით წარმოდგენილი პარტიები, აბსოლუტურად თანაბრად ვიზიარებთ ახალ კონსტიტუციასთან დაკავშირებულ პასუხისმგებლობას", - ვკითხულობთ განცხადებაში.

საქართველოს კონსტიტუციის პროექტს საქართველოს საპარლამენტო უმრავლესობის გარდა არ იზიარებს არც საპარალამენტო, არც არასაპარლამენტო ოპოზიცია და არც საქართველოს პრეზიდენტი. საპარლამენტო უმრავლესობა კი, კონსტიტუციის პროექტის მესამე მოსმენით განხილვას ხვალ, 26 სექტემბერს გეგმავს.