გერმანიის კანცლერმა, ფრიდრიხ მერცმა განაცხადა, რომ მისი ქვეყანა მზადაა, რომ აშშ-სგან დამატებითი Patriot-ის საჰაერო თავდაცვის სისტემები შეიძინოს და უკრაინას გადასცეს. მან ეს საკითხი აშშ-ის პრეზიდენტ დონალდ ტრამპთან განიხილა. ინფორმაციას Sky News ავრცელებს.

"ჩვენ მზად ვართ აშშ-სგან დამატებითი Patriot-ის სისტემები შევიძინოთ, რათა ისინი უკრაინისთვის ხელმისაწვდომი გავხადოთ", — განაცხადა მერცმა დღეს უკრაინის რეკონსტრუქციისადმი მიძღვნილ კონფერენციაზე.

მერცმა განაცხადა, რომ გასულ კვირას მან აშშ-ის პრეზიდენტ დონალდ ტრამპს Patriot-ის მიწოდება სთხოვა და დასძინა: "ამერიკელებს თავად სჭირდებათ ზოგიერთი მათგანი, მაგრამ მათაც ბევრი აქვთ. ჯერ საბოლოოდ არ არის დადგენილი, მოხდება თუ არა მიწოდება".

ამერიკული წარმოების Patriot-ის საჰაერო თავდაცვის სისტემები აშშ-ის და ნატოს რამდენიმე სხვა მოკავშირის საჰაერო თავდაცვის ძირითადი ნაწილია.

გამოცემა იხსენებს, რომ დეკემბერში აშშ დათანხმდა Patriot-ის სისტემის უკრაინაში გაგზავნას, მაგრამ ექსპერტების თქმით, ჯარისკაცების მომზადებას თვეები დასჭირდებოდა და მის ექსპლუატაციას დაახლოებით 90 სამხედრო მოსამსახურე დასჭირდებოდა.