"ჩვენ ვიყავით და ვრჩებით უკრაინის ყველაზე დიდ მხარდამჭერებად. ჩვენ ვზრუნავთ ამ ხალხზე", — ამის შესახებ აშშ-ის სახელმწიფო დეპარტამენტის პრესსპიკერმა ტემი ბრიუსმა ბრიფინგზე განაცხადა. მისი თქმით, აშშ-მა განაახლა იარაღის მიწოდებაც უკრაინისთვის.

"როგორც ჩვენს ბოლო ბრიფინგზე ვთქვი, როდესაც შეშფოთება გამოითქვა იმის თაობაზე, რომ შეიარაღების მიწოდება უკრაინისთვის შესაძლოა შეჩერებულიყო აშშ-ის მხრიდან — ჩემი გაფრთხილება მაშინ იყო: მოიცადეთ, ეს ერთჯერადი სიტუაციაა, და არ უნდა განიხილოთ როგორც ახალი პოლიტიკა ან პოზიცია. ჩვენ ვიყავით და ვრჩებით უკრაინის ყველაზე დიდ მხარდამჭერებად. ჩვენ ვზრუნავთ ამ ხალხზე. ჩვენ ვზრუნავთ იმაზე, რომ მათ ჰქონდეთ ყველაფერი, რაც დასჭირდებათ.

პრეზიდენტი ბევრჯერ ღიად საუბრობდა იმ მასშტაბურ მკვლელობებზე, რაც ხდება და როგორ უნდა შეწყდეს ეს ყველაფერი, რომ საჭიროა ცეცხლის შეწყვეტა და ეს უნდა მოხდეს ორივე მხარის მონაწილეობით.

ამ კონტექსტში ვთქვი, რომ უნდა მოგვეთმინა. და აი, გვაქვს არა მხოლოდ სიგნალი, არამედ განახლდა იარაღის მიწოდებაც უკრაინისთვის. პრეზიდენტი აქტიურად საუბრობს ამ საკითხზე. დეტალების გარეშე, ცხადია, პრეზიდენტს ძლიერი ემოციები და მტკიცე დამოკიდებულება აქვს უკრაინის თავდაცვისუნარიანობის მიმართ. ეს არის ვალდებულება.

და კაროლაინ ლევიტმა, ჩემმა კოლეგამ, გუშინ აღნიშნა, რომ მიწოდების დროებითი შეჩერება წარმოადგენდა სტანდარტულ გადახედვას იმ იარაღისა და დახმარების მიმართ, რასაც აშშ აწვდის ყველა ქვეყანასა და რეგიონს მსოფლიოში — არა მხოლოდ უკრაინას.

და რამდენიმე დღით ადრე პრეზიდენტმა ზელენსკიმ თავის სატელეფონო ზარზე ისაუბრა პრეზიდენტ ტრამპთან: "გვქონდა ძალიან კარგი საუბარი, ვფიქრობ, ეს იყო სტრატეგიულად მნიშვნელოვანი… ჩვენ ვეხმარებით მათ და გავაგრძელებთ დახმარებას". ეს პრეზიდენტი საუბრობს ზელენსკიზე. "ძალიან რთული მდგომარეობაა".

შესაბამისად, კიდევ ერთხელ — ჩვენ ვეხმარებით მათ, და გავაგრძელებთ დახმარებას. ეს ძალიან რთული სიტუაციაა. ასე რომ, ეს არის ჩვენი პოზიცია. ეს ყოველთვის ასე იყო, და მიხარია, რომ ახლა გარკვეულობა არსებობს, რაც წინა კვირაში არ იყო", — განაცხადა აშშ-ის სახელმწიფო დეპარტამენტის პრესსპიკერმა ტემი ბრიუსმა.