კოალიცია ცვლილებისთვის ერთ-ერთი ლიდერი ელენე ხოშტარია, რომელიც რუსთაველის გამზირზე მესამე დღეა შიმშლობს, აცხადებს, რომ შიმშილობას შეწყვეტს, თუ ოპოზიცია შეთანხმდება, რომ თვითმმართველობის არჩევნებში მონაწილეობას არ მიიღებს. ამის შესახებ IPN წერს.

"პალიტრანიუსის" გადაცემის "პოლიტ ქალაქის" წამყვანის კითხვაზე: "თუ ოპოზიცია შეთანხმდება და იტყვის, რომ არ მივდივართ არჩევნებზე, შეწყვეტთ შიმშილობას?", ელენე ხოშტარიამ უპასუხა: "კი".

"კი. თუ ეს სიცხადე ჩამოყალიბდება. მე არ ვამბობ, რომ სიცხადე ზუსტად მე, როგორც ვამბობ, ისეთი უნდა იყოს — პუნქტები, ზუსტად, რა ტიპის ბრძოლა უნდა იყოს. უბრალოდ, მე საზოგადოებას ვაცნობ ჩემს ხედვას, როგორ ვიბრძოლოთ. თუ ამ ხედვაზე ჩვენ ყველა ჩამოვყალიბდებით ერთიანად, თუნდაც კორექტირებებს შევიტანთ ფორმებში, (ჩემს ჭკუაზე კი არ უნდა იარონ), მაგრამ თუ პრინციპულად შევთანხმდებით ნულოვან ართანამშრომლობაზე, არშეგუებაზე, არაღიარებაზე, რა თქმა უნდა, მე, მაშინ მთელი ჩემი ენერგიით გადავერთვები ბრძოლაში, რომლისაც მჯერა“, — განაცხადა ელენე ხოშტარიამ.

გადაცემა "პოლიტ-ქალაქი" "პალიტრანიურის" ეთერში დღეს, 20:00 საათზე გავა.

შეხსენებისთვის, ელენე ხოშტარიამ შიმშილობა 27 ივნისს საღამოს გამოაცხადა, 28 ივნისს მას გედევან ფოფხაძეც შეუერთდა. მათთან ერთად კიდევ 3 აქტივისტი — ვასილ ელიავა, გიორგი სტეპანოვი და ბაჩო კუცია.