უშიშროების სამსახურის რეკომენდაციის მიხედვით, უკრაინის კულტურის სამინისტრომ შავ სიაში 27 პირი შეიყვანა. როგორც გადაწყვეტილებაში წერია, აღნიშნული პირები საშიშროებას წარმოადგენენ ეროვნული უსაფრთხოებისთვის.

სიაში შეყვანილნი არიან რეჟისორი ემირ კუსტურიცა, მსახიობი სტივენ სიგალი, რუსი მოქანდაკე ზურაბ წერეთელი, ასევე, რუსული ესტრადის წარმომადგენლები ნიკოლოზ ცისკარიძე, სტანისლავ პეხა, დმიტრი პევცოვი და სხვები.

უკრაინამ კულტურის სფეროში მომუშავე პირთა შავი სია 2015 წელს, მას შემდეგ შექმნა, რაც რუსეთის ფედერაციამ დაიპყრო ყირიმი და მხარს უჭერს აღმოსავლეთ უკრაინაში სეპარატისტულ მოძრაობას.

აღნიშნულ სიაში ამ დროისათვის 100-ზე მეტი პირია შეყვანილი, ძირითადად, რუსი მსახიობები და მომღერლები. აღნიშნული პირები რუსეთის ხელისუფლებასთან მჭიდროდ არიან დაკავშირებულნი, სარგებლობენ რუსეთის სამთავრობო პრივილეგიებითა და მათი აქტივობები, ძირითადად, რუსეთის ხელისუფლების მიზნებს ემსახურება.