მერაბ დვალიშვილი საქართველოშია. მას თბილისის საერთაშორისო აეროპორტში გულშემატკივრები დახვდნენ. UFC-ის მებრძოლმა მედიასთან აშშ-ს პრეზიდენტთან დონალდ ტრამპთან გასაუბრების შესახებაც ისაუბრა და გულშემატკივრებს უთხრა — რა გეგმები აქვს საქართველოში.

"პირველ რიგში ბედნიერი ვარ, რომ დავიცავი ჩემი ქამარი და სახლში დაბრუნება ყოველთვის მიხარია. ბედნიერი ვარ, ყველაფერი წინ არის, გაჩერებას არ ვაპირებ.

რა თქმა უნდა რამდენიმე სიტყვა ვუთხარი [ტრამპს] რასაც დეტალურად არ ვიტყვი ახლა. ვახსენე საქართველო, ჩემი და ჩემი ქვეყნის პატივისცემა დავუდასტურე კიდევ ერთხელ. კარგი ბრძოლა იყო, თვითონაც მოეწონა ჩემი ბრძოლა. რა თქმა უნდა, ყველაფერი ერთად ძალიან კარგი იყო. ჩემი გამარჯვება, როგორც იცით, ამერიკის პრეზიდენტის დარბაზში იყო და ზოგადად ქამარი კიდევ ერთხელ დავიცავი, კიდევ ერთხელ დავუმტკიცეთ ყველას, რომ მაგრები ვართ და ყველაფერი წინ არის.

რაც შეეხება ბრძოლას, ვფიქრობდი ფინიშს, მაგრამ ისე მოხდა, რომ ეს "მახრჩობელაც" მომზადებული მქონდა ყოველი შემთხვევისთვის, რადგან წინაზე სხვა "მახრჩობელათი" დაიცვა [თავი]. ვიცოდი, რომ ამით ვერ დაიცავდა, ამას ისე ვაკეთებ, რომ შეუძლებელია ამის დაცვა, როცა ხელებით ჩავკეტავ და, მოკლედ, მოვახერხე მისი "მახრჩობელათი" დამარცხება.

რაც შეეხება ქართველ გულშემატკივარს, ძალიან დიდ მადლობას ვეტყვი საქართველოშიც და მსოფლიოს მასშტაბით ყველა ემიგრანტს, ვინც გულშემატკივრობს.ძალიან დიდ ენერგიას ვიღებ მათგან. ისეთ ენერგიას ვიღებ, არასდროს არ მინდ ამ სპორტს თავი დავანებო და გპირდებით, რომ ჩემს მაქსიმუმს ამოვწურავ სანამ ჯანი და ღონე მაქვს. კიდევ ვვითარდები, გაჩერებას არ ვაპირებ" — განაცხადა მერაბ დვალიშვილმა (სტილი დაცულია).

შეგახსენებთ, რომ 8 ივნისს, მერაბ დვალიშვილმა აშშ-ს სახელით გამომსვლელი შონ ო'მალი დაამარცხა და UFC-ს საჩემპიონო ქამარი კარიერაში მეორედ დაიცვა, შემდეგ ოქტაგონიდან გადახტა და აშშ-ს პრეზიდენტ დონალდ ტრამპთან მივიდა, მისგან მილოცვები მიიღო და ფოტოც გადაიღო.