პარტია ფედერალისტების ლიდერი გიგა ბოკერია ამბობს, რომ "ოპონენტებისთვის საჯარო მობოდიშების და მონანიების იძულება — კიდევ ერთი საგანგაშო და სამარცხვინო სიმპტომია".

მისივე თქმით, რეჟიმის დამარცხებასთან ერთად წარსულს უნდა ჩაბარდეს ოპონენტების დევნა მსგავსი მეთოდებით.

"რეჟიმის ლიდერის და ოლიგარქის ან მისი ოჯახის წევრების პერსონალური შეურაცხყოფის ან უხამსი პოლიტიკური კრიტიკის გამო ოპონენტებისთვის საჯარო მობოდიშების და მონანიების იძულება — კიდევ ერთი საგანგაშო და სამარცხვინო სიმპტომია იმისა, თუ საით მიჰყავს ივანიშვილის რეჟიმს ქვეყანა.

რაც არ უნდა მოვისმინოთ ამ საკითხთან დაკავშირებით რეჟიმის პროპაგანდისგან ან შსს-სგან, ის, რაც უკვე ვიხილეთ და რაც უდავოა — ვგულისხმობ საჯარო მონანიებას ხელისუფლების ოპონენტისგან, სრულიად საკმარისია იმ დასკვნის გამოსატანად, რომ აქ სწორედ ასეთ სახიფათო მოვლენასთან გვაქვს საქმე.

ივანიშვილის რეჟიმის დამარცხებასთან ერთად სამუდამოდ წარსულს უნდა ჩავაბაროთ ძალაუფლების მქონე პირთაგან ოპონენტების ასეთი ამაზრზენი მეთოდებით დევნა", — წერს გიგა ბოკერია Facebook-ზე.

ცნობისთვის, ორი დღის წინ, კოტე იოსელიანმა გაავრცელა ვიდეო, სადაც ის 2018 წელს გაკეთებული განცხადების გამო ქართული ოცნების დამფუძნებლის და პარტიის საპატიო თავმჯდომარის, ბიძინა ივანიშვილის შვილს, უტა ივანიშვილს ბოდიშს მეორედ უხდის.

ენმ-ის თავმჯდომარემ თინა ბოკუჩავამ 9 ივნისს გამართულ ბრიფინგზე განაცხადა, რომ იოსელიანს ვიდეოს გამოქვეყნება მასზე განხორციელებული ზეწოლის გამო მოუწია. ამ განცხადების შემდეგ თინა ბოკუჩავა გამოკითხვაზე დაიბარეს, მანამდე აღნიშნული დეპარტამენტიდან დაუკავშირდნენ მის მეუღლეს, კოტე იოსელიანსაც.

იხილეთ ასევე: