6 ივნისს ევროკომისიამ დღეს მიიღო საბოლოო შეტყობინება უკრაინისგან ყველა იმ კანონის შესახებ, რომელიც მობილური ტელეფონების მომხმარებლებისთვის ევროკავშირის როუმინგის ზონაში მოხვედრას ისახავს მიზნად. უკრაინა და მოლდოვა ამ ტერიტორიას 2026 წლის 1 იანვარს შეუერთდება, — ამის შესახებ ინფორმაციას რადიო თავისუფლების ევროპის ბიუროს რედაქტორი რიკარდ იოზვიაკი ავრცელებს.

მისი თქმით, "პირველად ხდება, როცა როუმინგი ევროკავშირის კანდიდატ ქვეყნებზეც გავრცელდა — უკრაინასა და მოლდოვაზე".

შეგახსენებთ, რომ უკრაინისა და მოლდოვის მსგავსად ევროკავშირის კანდიდატი ქვეყნის სტატუსი აქვს საქართველოსაც, მაგრამ საქართველოსთან მოლაპარაკებები არ გახსნილა. 2024 წლის ნოემბერში ოცნების პრემიერმინისტრმა, ირაკლი კობახიძემ განაცხადა, რომ ოცნების ხელისუფლება საქართველოს ევროკავშირში ინტეგრაციის პროცესს 2028 წლამდე აპაუზებს.

"დღეს მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკების გახსნის საკითხი. ასევე, 2028 წლის ბოლომდე უარს ვამბობთ ყოველგვარ საბიუჯეტო გრანტზე ევროკავშირის მხრიდან.

2028 წლის ბოლო არის ის დრო, როდესაც საქართველო იქნება მზად, ეკონომიკური თვალსაზრისით სათანადოდ მომზადებული, რათა გახსნას მოლაპარაკებები 2030 წელს ევროკავშირში გასაწევრიანებლად.

ჩვენ ვაპირებთ არა მათხოვრობით და ცალ ფეხზე დგომით ევროკავშირში შესვლას, არამედ ევროკავშირში ღირსეულად გაწევრიანებას გამართული დემოკრატიული სისტემითა და ძლიერი ეკონომიკით", — თქვა ირაკლი კობახიძემ.