რომის ახალი პაპი ლეო XIV აპირებს, რომ უკრაინასა და რუსეთს სამშვიდობო მოლაპარაკების გამართვა ვატიკანში შესთავაზოს. ამის შესახებ ვატიკანის სახელმწიფო მდივანმა, კარდინალმა პიეტრო პაროლინმა განაცხადა.

ინფორმაციას იტალიური გამოცემა La Stampa ავრცელებს.

პაროლინმა სტამბოლში გამართული შეხვედრების შედეგს "ტრაგიკული" უწოდა.

"ეს ყველაფერი ტრაგიკულია, რადგან ჩვენ ვიმედოვნებდით, რომ პროცესი დაიწყებოდა, შესაძლოა ნელა, მაგრამ კონფლიქტის მშვიდობიანი გზით მოგვარებით. ამის ნაცვლად, ჩვენ ისევ საწყის წერტილში ვართ", — განაცხადა ვატიკანის სახელმწიფო მდივანმა სტამბოლში სამიტისადმი მიძღვნილი ღონისძიების ფარგლებში.

"ახლა ვნახოთ, რა ვქნათ, თუმცა სიტუაცია ძალიან რთული და დრამატულია", — დასძინა პაროლინმა.

პაპი აპირებს, აღნიშნა მან, "საჭიროების შემთხვევაში, ვატიკანი, წმინდა საყდარი, ხელმისაწვდომი გახადოს ორ მხარეს შორის პირდაპირი შეხვედრისთვის", — განაცხადა ვატიკანის სახელმწიფო მდივანმა.

შეგახსენებთ, რომ ევროკომისიის პრეზიდენტმა, ურსულა ფონ დერ ლაიენმა განაცხადა, რომ რუსეთის ფედერაციის მეთაურის, ვლადიმერ პუტინის ბოლოდროინდელი ქმედებები მიუთითებს მის სურვილზე, ეძიოს მშვიდობა და, შესაბამისად, აუცილებელია მასზე სანქციებით ზეწოლის გაძლიერება.

ხუთშაბათს, აშშ-ის პრეზიდენტმა დონალდ ტრამპმა განაცხადა, რომ რუსეთისა და უკრაინის ომის მშვიდობიანი მოგვარება შეუძლებელია კრემლის ლიდერ ვლადიმერ პუტინთან მისი შეხვედრის გარეშე.

აშშ-ის სახელმწიფო მდივანმა მარკო რუბიომ გაიმეორა ეს მოსაზრება და სკეპტიციზმი გამოთქვა პარასკევს სტამბოლში უკრაინა-რუსეთის მოლაპარაკებების შედეგებთან დაკავშირებით.